ST Bus News लोणी काळभोर, ता. ८ : कुंजीरवाडी (ता. हवेली) येथे एसटी महामंडळाचा अधिकृत थांबा सुरू करण्यात यावा, या मागणीसाठी शिवसेना हवेली तालुका प्रमुख स्वप्नील कुंजीर यांनी एसटी महामंडळाच्या पुणे विभागीय मुख्य अधिकारी अरुण भगतसिंग सिया यांना निवेदन सादर केले. यावेळी सामाजिक कार्यकर्ते गणेश कुंजीर उपस्थित होते. ST Bus News
कुंजीरवाडी हे गाव लोकसंख्या, व्यापार आणि रहिवाशांच्या दृष्टीने वेगाने विकसित होत असून, येथे मराठवाडा आणि विदर्भातील हजारो कुटुंबे वास्तव्यास आहेत. सोलापूर, धाराशिव, बीड, लातूर, नांदेड, परभणी आणि अहिल्यानगरसह विविध जिल्ह्यांतील नागरिक रोजगार, व्यवसाय आणि शिक्षणासाठी कुंजीरवाडीत स्थायिक झाले आहेत. मात्र गावात एसटीचा थांबा नसल्यामुळे नागरिकांना प्रवासासाठी मोठ्या अडचणींचा सामना करावा लागत आहे. ST Bus News
विशेषतः महिला, ज्येष्ठ नागरिक, विद्यार्थी आणि कामगार वर्गाला रोजच्या प्रवासात त्रास सहन करावा लागत असून, गाणगापूर, तुळजापूर, पंढरपूर आणि अक्कलकोटसारख्या धार्मिक स्थळांना जाणाऱ्या भाविकांचीही मोठी गैरसोय होत आहे. कुंजीरवाडीपासून जवळपास सात किलोमीटर अंतरावर दुसरा एसटी थांबा असल्याने नागरिकांना खासगी वाहनांवर अवलंबून राहावे लागत आहे.
सरकारी दवाखान्याजवळ एसटी थांबा सुरू झाल्यास परिसरातील हजारो नागरिकांना मोठा दिलासा मिळेल, असा विश्वास स्वप्नील कुंजीर पाटील यांनी व्यक्त केला. गावाची वाढती लोकसंख्या, व्यापारी महत्त्व आणि नागरिकांची गरज लक्षात घेऊन प्रशासनाने तातडीने सकारात्मक निर्णय घ्यावा, अशी मागणी यावेळी करण्यात आली. दरम्यान, विभागीय अधिकारी अरुण भगतसिंग सिया यांच्यासोबत झालेल्या चर्चेत लवकरच याबाबत सकारात्मक कार्यवाही करण्याचे आश्वासन देण्यात आल्याची माहितीही यावेळी देण्यात आली.
