छत्रपती संभाजीनगर: छत्रपती संभाजीनगरमध्ये (Chhtrapati Sambhajinagar) रविवारी सकाळी (Crime News) एक धक्कादायक घटना घडली असून मेहुण्याने संतापाच्या भरात भावोजीचा लोखंडी पकड डोक्यात मारून खून केल्याची माहिती समोर आली आहे. ही घटना उस्मानपुरा परिसरात सकाळी सुमारे सात वाजेच्या सुमारास घडली. या प्रकरणी उस्मानपुरा पोलीस ठाण्यात गुन्हा दाखल करण्यात आला असून आरोपीला अटक करण्यात आली आहे. या घटनेनंतर परिसरात एकच खळबळ उडाली आहे.
खून झालेल्या व्यक्तीचे नाव संतोष काशिनाथ खाजेकर (वय 38, रा. म्हाडा कॉलनी, ता. गंगापूर) असे आहे. तर आरोपीचे नाव बळीराम कल्याण जगधने (रा. रांजणगाव शेणपुंजी एमआयडीसी वाळूज, सध्या मुक्काम उस्मानपुरा) असे आहे. पोलिसांकडून मिळालेल्या माहितीनुसार, बळीराम जगधने हा आपल्या कुटुंबासह उस्मानपुरा भागात वास्तव्यास आहे.
मयताच्या मुलांनी दिलेल्या फिर्यादीनुसार, संतोष हे बळीरामचे मेहुणे असून रात्री ड्युटीवर गेले होते. त्या दरम्यान संतोष हे त्यांच्या घरी मुक्कामी आले होते. सकाळी बळीराम ड्युटी संपवून घरी आला असता त्याने पाहिले की भावोजी संतोष हे टेबलखाली लपले आहेत. हा प्रकार पाहताच बळीराम संतापला आणि दोघांमध्ये जोरदार वाद झाला. रागाच्या भरात बळीराम जगधने याने लोखंडी पकड डोक्यात मारून संतोष यांचा जागीच खून केला.
घटनेनंतर आरोपीने पत्नीवरही हल्ला करून सायकल डोक्यात मारून ठार मारण्याचा प्रयत्न केल्याचे समजते. त्यानंतर आरोपीच्या पत्नीने संतोष यांच्या मुलाला फोन करून घटनेची माहिती दिली. मुलगा तात्काळ मामाच्या घरी पोहोचला असता त्याला वडील रक्ताच्या थारोळ्यात पडलेले दिसले. त्याने लगेच वडिलांना घाटी रुग्णालयात दाखल केले. मात्र डॉक्टरांनी तपासून त्यांना मृत घोषित केले.
या घटनेनंतर उस्मानपुरा पोलिसांनी तातडीने घटनास्थळी धाव घेत आरोपीला अटक केली. आरोपीला न्यायालयात हजर केल्यानंतर न्यायालयाने त्याला 21 ऑक्टोबरपर्यंत पोलीस कोठडी सुनावली आहे. पुढील तपास उस्मानपुरा पोलीस ठाण्याचे अधिकारी करत आहेत.
