Chhatrapati Sambhaji Nagar : छत्रपती संभाजीनगर : देशभरात दिवाळीचा सण मोठ्या उत्साहात साजरा केला जातो. दुसरीकडे, लक्ष्मीपूजनाच्या दिवशी छत्रपती संभाजीनगर शहरात वेगवेगळ्या आगीच्या घटनेत मोठ्या प्रमाणात नुकसान झाले आहे. या घटनांमध्ये सुदैवाने कोणालाही दुखापत झाली नाही. दरम्यान, फटाक्यांमुळे 10 ठिकाणी आगी लागल्याच्या घटना घडल्याच समोर आलं आहे. आगीच्या घटनेत 15 लाखांचे नुकसान झाले आहे. अग्निशमन दलाने घटनास्थळी धाव घेऊन आग आटोक्यात आणल्याचे पाहायला मिळाले.
कोठे आगीच्या घटना घडल्या?
दिवाण देवडी, उस्मानपुरा, सातारा परिसर नक्षत्र वाडी पानचक्की परिसर, चिकलठाणा परिसर या ठिकाणी आग लागली. नक्षत्र वाडीतील एका सोसायटीतील सहाव्या मजल्यावर आग लागली होती. यामध्ये संसार उपयोगी वस्तू जळून खाक झाले. छत्रपतीनगरात अय्यप्पा मंदिरासमोरील न्यू इंग्लिश स्कूलमध्ये एका वर्गखोलीतून मोठ्या प्रमाणात धूर येत असल्याने नागरिकांनी अग्निशमन विभागाला कळविले. रॉकेट खोलीत घुसल्याने शैक्षणिक साहित्याला आग लागली. पण ती वेळीच नियंत्रणात आली.
अशी घ्या काळजी
काहींना हातात फटाके घेऊन फोडण्याची सवय असते. नागरिकांनी फटाके फोडण्याचा आनंद घेतानाच काळजी घेणं देखील महत्वाचे आहे. दिवाळीत फटाके फोडत असतांना बोटाला आणि हाताला सर्वात जास्त इजा होण्याची शक्यता असते. त्यामुळे काळजी घेतली पाहिजे. तसेच डोळ्याला इजा होऊ नये म्हणून फटाके फोडताना चष्मा घातला पाहिजे.
