दौंड, ता. २७ : धाराशिव जिल्ह्यातील राघुचीवाडी येथे ११ वर्षीय मुलाला घराच्या टेरेसवर नेऊन लोखंडी गजाला बांधून अमानुष मारहाण केल्याचा धक्कादायक प्रकार समोर आला आहे. मराठी वाचता येत नसल्याच्या कारणावरून सावत्र आई, आजी आणि एका नातेवाईकाने बालकाला बेदम मारहाण करत जीवे मारण्याची धमकी दिल्याप्रकरणी दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, खोरवडी (ता. दौंड) येथील शेतकरी संजय साहेबराव गुन्नर यांनी याप्रकरणी फिर्याद दिली आहे. त्यांच्या मुलगी राणी हिचा मृत्यू २०१४ मध्ये झाल्यानंतर तिचा मुलगा यशराज महादेव कर्वेल (वय ११) हा आजोबा-आजींकडे खोरवडी येथे राहत होता. काही वर्षांपूर्वी यशराजचे वडील महादेव कर्वेल यांनी दुसरे लग्न केल्यानंतर दोन वर्षांपूर्वी यशराजला शिक्षणाच्या कारणास्तव धाराशिव जिल्ह्यातील राघुचीवाडी येथे नेण्यात आले होते.
२३ जून रोजी सकाळी फिर्यादी संजय गुन्नर यांना एका नातेवाईक महिलेचा फोन आला. यशराजला सावत्र आई पूजा महादेव कर्वेल, दादा संजय भुजनर आणि आजी शकुंतला नरसु कर्वेल मारहाण करत असल्याची माहिती तिने दिली. त्यानंतर फिर्यादी यांनी संबंधितांना फोन करून मुलाला मारहाण करू नका, अन्यथा पोलिसांत तक्रार करीन, असा इशारा दिला.
रात्री यशराजला दौंड येथील गोकुळ हॉटेलजवळ आणून सोडण्यात आले. घरी आल्यानंतर यशराजने आजोबांना आपल्यावर झालेल्या अत्याचाराची माहिती दिली. मराठी वाचता येत नसल्याच्या कारणावरून आरोपींनी त्याला घराच्या टेरेसवर नेले. तेथे पोटाला लोखंडी गजाला बांधून दोन्ही पाय बांधले. त्यानंतर सावत्र आई पूजा कर्वेल आणि दादा भुजनर यांनी हाताने मारहाण केली, तर आजी शकुंतला कर्वेल यांनी प्लास्टिकच्या पाईपने हातावर मारहाण करून “जिवे मारून टाकीन” अशी धमकी दिल्याचे यशराजने सांगितले.
या घटनेनंतर यशराज प्रचंड घाबरला असून त्याला तापही आला होता. प्रकृती सुधारल्यानंतर फिर्यादी यांनी दौंड पोलीस ठाण्यात तक्रार दाखल केली. या प्रकरणी पूजा महादेव कर्वेल, दादा संजय भुजनर आणि शकुंतला नरसु कर्वेल (सर्व रा. राघुचीवाडी, जि. धाराशिव) यांच्याविरुद्ध भारतीय न्याय संहिता कलम 115(2), 351(2), 3(5) तसेच बाल न्याय (मुलांची काळजी व संरक्षण) अधिनियम, 2015 च्या कलम 75 अन्वये गुन्हा दाखल करण्यात आला आहे. पुढील तपास दौंड पोलीस करत आहेत.
