बीड: बीड जिल्ह्यातील आष्टी तालुक्यातून एक अत्यंत धक्कादायक आणि संतापजनक घटना समोर आली आहे. १५ वर्षांच्या शाळकरी मुलीवर झालेल्या अत्याचारातून तिने एका बाळाला जन्म दिल्याची ही घटना उघडकीस आल्याने परिसरात मोठी खळबळ उडाली आहे.
पीडित मुलगी बीड-अहिल्यानगर महामार्गालगतच्या शाळेत शिकत आहे. साधारण वर्षभरापूर्वी, शाळा सुटल्यावर घरी जात असताना एका अज्ञात व्यक्तीने तिला ‘गावात सोडतो’ असे आमिष दाखवून वाहनात बसवले. त्यानंतर तिला एका निर्जन स्थळी नेऊन तिच्यावर बळजबरीने लैंगिक अत्याचार केले. नराधमाने तिला जीवे मारण्याची धमकी दिल्याने घाबरलेल्या मुलीने हा प्रकार कोणालाही सांगितला नाही आणि वर्षभर ती हा मानसिक व शारीरिक त्रास सहन करत राहिली.
दोन दिवसांपूर्वी मुलीला पोटात तीव्र कळा येऊ लागल्याने पालकांनी तिला तातडीने अहिल्यानगर येथील रुग्णालयात उपचारांसाठी नेले. तिथे वैद्यकीय तपासणीदरम्यान ती गरोदर असल्याचे निष्पन्न झाले आणि काही वेळातच तिने एका बाळाला जन्म दिला. डॉक्टरांनी तत्काळ अंभोरा पोलिसांना या गंभीर प्रकाराची माहिती दिली.
अंभोरा पोलिसांनी पीडित मुलीचा जबाब नोंदवून घेतला असून अज्ञात नराधमाविरुद्ध गुन्हा दाखल केला आहे. नवीन कायद्यानुसार भारतीय न्याय संहितेचे कलम ६५ (१) आणि बाललैंगिक अत्याचार प्रतिबंधक कायदा (POCSO) च्या कलम ४ व ८ अन्वये हा गुन्हा नोंदवण्यात आला आहे.
अंभोरा पोलीस ठाण्याचे साहाय्यक पोलीस निरीक्षक विक्रांत हिंगे यांनी सांगितले की, पोलीस या प्रकरणाचा सर्व बाजूंनी सखोल तपास करत आहेत आणि मुख्य आरोपीचा शोध घेऊन त्याला लवकरात लवकर बेड्या ठोकल्या जातील. ही घटना समाजासाठी अत्यंत लाजीरवाणी असून अल्पवयीन मुलींच्या सुरक्षिततेचा प्रश्न पुन्हा एकदा गंभीरपणे समोर आला आहे.
