पुणे: अन्न आणि औषध प्रशासनाचे (FDA) आयुक्त तुकाराम मुंढे यांच्या कार्यपद्धतीवर आता विभागातीलच अधिकारी आणि कर्मचाऱ्यांनी प्रश्न उपस्थित केले आहेत. छत्रपती संभाजीनगर येथील राज्य अन्न व औषध प्रशासन प्रयोगशाळेतील 29 अधिकारी आणि कर्मचाऱ्यांनी तुकाराम मुंढे यांच्या विरोधात लेखी तक्रार दाखल केली आहे. ही लेखी तक्रार अन्न व औषध प्रशासन मंत्री नरहरी झिरवाळ यांच्याकडे देण्यात आली आहे.
15 जुलै रोजी देण्यात आलेल्या या निवेदनात प्रयोगशाळेतील कामाचा वाढलेला ताण, अपुरे मनुष्यबळ आणि नवीन कामकाज पद्धतीबाबत नाराजी व्यक्त करण्यात आली आहे. कर्मचाऱ्यांच्या म्हणण्यानुसार, प्रयोगशाळेत अचानक दोन शिफ्टमध्ये काम सुरू करण्याचा निर्णय घेण्यात आला. मात्र, त्यासाठी आवश्यक कर्मचारी आणि सुविधा उपलब्ध करून देण्यात आलेल्या नाहीत.
कर्मचाऱ्यांनी आरोप केला आहे की, रिक्त पदांमुळे आधीच कामाचा भार वाढला आहे. त्यातच सकाळी 9 वाजल्यापासून रात्री 12 वाजेपर्यंत काम करावे लागत आहे. तसेच शनिवार, रविवार आणि सार्वजनिक सुट्टीच्या दिवशीही काम करण्याचे आदेश दिल्याने कर्मचाऱ्यांमध्ये नाराजी आहे.
अन्न, औषधे आणि सौंदर्यप्रसाधनांच्या नमुन्यांची तपासणी करताना पुरेसा वेळ आवश्यक असतो. भारतीय औषध संहिता (IP), ब्रिटिश फार्माकोपिया (BP) आणि USP यांसारख्या मानकांनुसार तपासणी करावी लागते. मात्र, वाढलेल्या नमुन्यांच्या दबावामुळे तपासणीच्या गुणवत्तेवर परिणाम होण्याची भीती कर्मचाऱ्यांनी व्यक्त केली आहे.
प्रयोगशाळेची क्षमता, उपकरणे आणि कर्मचारी संख्या वाढविल्यानंतरच दोन शिफ्ट सुरू कराव्यात, अशी मागणी करण्यात आली आहे. तसेच पूर्वीची कार्यालयीन वेळ लागू करावी आणि अतिरिक्त कामासाठी योग्य सुविधा व भत्ते द्यावेत, असेही निवेदनात म्हटले आहे.
दरम्यान, तुकाराम मुंढे यांच्या अडचणी वाढताना दिसत आहेत. मुंबई उच्च न्यायालयानेही FDA च्या कारवाईच्या पद्धतीवर प्रश्न उपस्थित केले आहेत. केवळ खासगी आस्थापनांवर कारवाई न करता सरकारी आणि निमसरकारी ठिकाणच्या कँटिनचीही तपासणी करण्याचे निर्देश न्यायालयाने दिले आहेत. एका प्रकरणाच्या सुनावणीदरम्यान न्यायालयाने किरकोळ कारणांवरून थेट परवाना रद्द करण्याच्या निर्णयावरही निरीक्षण नोंदवले.
