BJP Clash : छत्रपती संभाजीनगर : महापालिका निवडणुकीसाठी (Municipal Elections) उमेदवारी न मिळाल्यामुळे विविध राजकीय पक्षांमध्ये इच्छुकांची नाराजी उघडपणे समोर येऊ लागली आहे. छत्रपती संभाजीनगरमध्ये भाजप (BJP) कार्यालयात मोठा गोंधळ झाल्याची घटना घडली आहे. पक्षाने उमेदवारी नाकारल्याने नाराज झालेले कार्यकर्ते आणि पदाधिकारी आक्रमक झाले असून त्यांनी थेट राज्याचे मंत्री अतुल सावे यांच्या कार्यालयात धडक दिली.
महापालिका निवडणुकीसाठी उमेदवारी अर्ज दाखल करण्याची मुदत संपण्यास काही तासच शिल्लक राहिले आहेत. संभाव्य बंडखोरीच्या भीतीने भाजपसह इतर राजकीय पक्षांनी अद्याप अधिकृत उमेदवारांची यादी जाहीर केलेली नाही. छत्रपती संभाजीनगरमध्ये भाजप आणि शिंदे गटाची युती तुटल्यानंतर एबी फॉर्मचे वाटप सुरू झाले असून त्यातूनच नाराजीचा उद्रेक झाल्याचे दिसून येत आहे.
पहा व्हिडिओ
View this post on Instagram
नाराज इच्छुकांनी आम्ही अनेक वर्षे पक्षासाठी मेहनत घेतली, रक्ताचे पाणी केले, मात्र तरीही उमेदवारी इतरांना सहज कशी दिली जाते, असा सवाल उपस्थित केला. पक्षासाठी प्रामाणिकपणे काम करूनही बाहेरून आलेल्या लोकांना संधी दिली जात असल्याचा आरोप नाराजांनी केला आहे. या संतप्त वातावरणात दिव्या मराठे या तरुणीने आत्मदहनाचा प्रयत्न केल्याने एकच खळबळ उडाली. ही घटना मंत्री अतुल सावे यांच्या कार्यालयात घडली.
घटनेची माहिती मिळताच पोलिसांनी तत्काळ हस्तक्षेप केला. परिस्थिती चिघळत असल्याचे लक्षात येताच पोलिसांनी आक्रमक झालेल्या नाराज कार्यकर्त्यांना अडवले. काही जणांना ताब्यात घेण्यात आल्याची माहिती समोर आली आहे. सुदैवाने वेळेवर हस्तक्षेप झाल्यामुळे मोठा अनर्थ टळला.
या घटनेमुळे महापालिका निवडणुकीच्या पार्श्वभूमीवर राजकीय पक्षांतील अंतर्गत नाराजी पुन्हा एकदा चव्हाट्यावर आली आहे. उमेदवारीच्या वाटपावरून निर्माण झालेला हा वाद पुढील काळात आणखी वाढण्याची शक्यता व्यक्त केली जात असून राजकीय वातावरण तापले आहे.
