पुणे: केंद्रीय सहकार आणि नागरी हवाई वाहतूक राज्यमंत्री मुरलीधर मोहोळ यांचे वडील किसनराव दगडोबा मोहोळ यांचे वयाच्या 86 व्या वर्षी निधन झाले. गुरुवारी रात्री 10:20 वाजता त्यांनी अखेरचा श्वास घेतला. त्यांच्या निधनामुळे मोहोळ कुटुंबावर शोककळा पसरली असून पुण्यातील राजकीय, सामाजिक आणि क्रीडा क्षेत्रात हळहळ व्यक्त केली जात आहे.
किसनराव मोहोळ हे केवळ केंद्रीय मंत्री मुरलीधर मोहोळ यांचे वडील नव्हते, तर ते एक नामांकित पैलवान आणि सहकार क्षेत्रातील ज्येष्ठ व्यक्तिमत्त्व म्हणून ओळखले जात होते. कुस्तीची आवड त्यांनी आयुष्यभर जपली आणि अनेक स्पर्धांमध्ये सहभाग घेतला होता. तसेच पुणे जिल्हा मध्यवर्ती सहकारी बँकेत तब्बल 40 वर्षे सेवा बजावत त्यांनी सहकार क्षेत्रातही मोलाचे योगदान दिले.
त्यांच्या निधनाची बातमी समोर येताच विविध क्षेत्रातील मान्यवरांनी शोक व्यक्त केला आहे. क्रीडा, सहकार आणि सामाजिक क्षेत्रात त्यांनी केलेल्या कार्याची आठवण यावेळी अनेकांनी काढली.
किसनराव मोहोळ यांचे पार्थिव शुक्रवारी, 19 जून रोजी सकाळी 7 ते 9 या वेळेत कोथरूड येथील वेणूकृष्णा निवासस्थानी अंत्यदर्शनासाठी ठेवण्यात येणार आहे. त्यानंतर सकाळी 10 वाजता पुण्यातील नवी पेठ येथील वैकुंठ स्मशानभूमीत त्यांच्या पार्थिवावर अंत्यसंस्कार करण्यात येणार आहेत.
मुरलीधर मोहोळ यांना कुस्तीचा वारसा त्यांच्या वडिलांकडूनच लाभला होता. मोहोळ कुटुंबाची पैलवानीची परंपरा असून कुटुंब 1975 मध्ये पुण्यात स्थायिक झाले. पुढे मुरलीधर मोहोळ यांनी आखाड्यातील प्रवासानंतर राजकारणात प्रवेश करत सार्वजनिक जीवनात आपली स्वतंत्र ओळख निर्माण केली. किसनराव मोहोळ यांच्या निधनाने मोहोळ कुटुंबासह पुण्याने एक ज्येष्ठ क्रीडाप्रेमी आणि सहकार क्षेत्रातील अनुभवी व्यक्तिमत्त्व गमावले आहे.
