पुणे: पुणे आणि पिंपरी-चिंचवडमधील चाकरमान्यांसाठी आणि विशेषतः हिंजवडी आयटी पार्कमध्ये रोज ये-जा करणाऱ्या नोकरदारांसाठी एक अतिशय दिलासादायक बातमी समोर आली आहे. पुणे मेट्रोच्या अत्यंत महत्त्वाच्या आणि बहुप्रतिक्षित माण-हिंजवडी ते शिवाजीनगर (लाईन-3) या नवीन मार्गावर पूर्णपणे ‘स्मार्ट डिजिटल तिकीट प्रणाली’ सुरू करण्यात येत आहे. या आधुनिक सुविधेमुळे तिकीट अगदी काही सेकंदांमध्येच डिजिटल पद्धतीने मिळवणे शक्य होणार आहे.
प्रवाशांचा रोजचा प्रवास अधिक सोपा आणि सुखकर व्हावा यासाठी या यंत्रणेत अनेक आधुनिक पर्याय उपलब्ध करून देण्यात आले आहेत. यामध्ये थेट व्हॉट्सॲपवर क्यूआर (QR) तिकीट मिळवणे, मोबाईल ॲप, स्वयंचलित तिकीट व्हेंडिंग मशीन (TVM) आणि पारंपारिक तिकीट काउंटर अशा सर्व सुविधांचा समावेश असणार आहे. भविष्यात जिल्हा न्यायालय स्थानकावर मेट्रोच्या सर्व मार्गांचे एकत्रीकरण झाल्यानंतर प्रवाशांना एकाच मोबाईल ॲपवरून संपूर्ण पुणे मेट्रो नेटवर्कचे तिकीट काढण्याची सुविधा मिळणार आहे.
विशेष उल्लेखनीय म्हणजे, केंद्र सरकारच्या ‘वन नेशन, वन कार्ड’ या उपक्रमांतर्गत या मार्गावर नॅशनल कॉमन मोबिलिटी कार्ड वापरता येणार आहे. या एकाच कार्डच्या माध्यमातून प्रवाशांना पुण्याच्या इतर मेट्रो मार्गांवर तसेच देशातील कोणत्याही शहरात मेट्रो सेवांचा सहज आनंद घेता येईल.
पहिल्या टप्प्यात सुरू होणाऱ्या 12 स्थानकांवर ‘ऑटोमॅटिक फेअर कलेक्शन’ (AFC) ही हायटेक प्रणाली बसवण्यात आली आहे. या डिजिटल आणि पर्यावरणपूरक सुविधेमुळे नागरिकांचा वेळ वाचणार आहे.
