पुणे : नवले पूल आणि कात्रज-आंबेगाव रस्ता परिसरातील दोन लॉजमध्ये सुरू असलेल्या कथित देहव्यापारावर गुन्हे शाखेच्या अनैतिक मानवी वाहतूक प्रतिबंधक कक्षाने धडक कारवाई करत नऊ तरुणींची सुटका केली. या प्रकरणी रिक्षाचालकासह लॉज व्यवस्थापकाला अटक करण्यात आली असून आणखी एका संशयिताचा शोध सुरू आहे.
पोलिसांनी दिलेल्या माहितीनुसार, कात्रज-आंबेगाव रस्ता आणि नवले पुलाजवळील ‘साई किरण लॉज’ आणि ‘गॅलेक्सी लॉज’मध्ये बाहेरून महिलांना आणून त्यांच्याकडून बळजबरीने देहव्यापार करून घेतला जात असल्याची गोपनीय माहिती अनैतिक मानवी वाहतूक प्रतिबंधक कक्षाला मिळाली होती. त्यानंतर पोलिसांनी बनावट ग्राहक पाठवून माहितीची खातरजमा केली.
बनावट ग्राहकांकडून खात्रीशीर माहिती मिळाल्यानंतर सोमवारी दोन्ही लॉजवर छापे टाकण्यात आले. या कारवाईत वेगवेगळ्या खोल्यांमध्ये ठेवण्यात आलेल्या नऊ तरुणींची सुटका करण्यात आली.
या प्रकरणी राकेश राजू पाटोळे (वय २७, रा. गणेशनगर, धायरी) आणि लॉज व्यवस्थापक मंगेश व्यंकट बनसोडे यांना अटक करण्यात आली आहे. राकेश पाटोळे हा रिक्षाचालक असून, या रॅकेटमध्ये त्याची महत्त्वाची भूमिका असल्याचा पोलिसांना संशय आहे.
या दोघांव्यतिरिक्त आणखी एका साथीदाराविरुद्ध आंबेगाव पोलीस ठाण्यात गुन्हा दाखल करण्यात आला असून त्याचा शोध सुरू आहे. गुन्हे शाखेच्या अनैतिक मानवी वाहतूक प्रतिबंधक कक्षाकडून प्रकरणाचा पुढील तपास सुरू आहे.
