बदलापूर : साडी घेऊन न दिल्याच्या वादातून पत्नीने पतीची हत्या केल्याची धक्कादायक घटना बदलापूरमधील शिरगाव येथे उघडकीस आली आहे. या प्रकरणी बदलापूर पूर्व पोलिसांनी आरोपी पत्नीला अटक करून हत्येचा गुन्हा दाखल केला आहे.
पोलिसांनी दिलेल्या माहितीनुसार, शिरगाव येथे राहणारे हरेराम सिंग आणि त्यांची पत्नी सुनीता देवी यांच्यात संध्याकाळी साडेसातच्या सुमारास साडीवरून वाद झाला. प्राथमिक तपासानुसार, संतापाच्या भरात सुनीता देवी यांनी प्रथम पतीच्या डोक्यात प्रेशर कुकरने वार केला आणि त्यानंतर गळा आवळून त्यांची हत्या केली. हरेराम सिंग हे अपंग असल्याने अंथरुणावर होते.
घटनेच्या वेळी दाम्पत्याचा सात वर्षांचा मुलगा घरात उपस्थित होता. सुरुवातीला आरोपी महिलेने पोलिसांची दिशाभूल करण्याचा प्रयत्न केला. मात्र, मुलाचा जबाब नोंदवल्यानंतर संपूर्ण प्रकार उघडकीस आला.
पोलिसांच्या माहितीनुसार, पती-पत्नीमध्ये यापूर्वीही वारंवार वाद होत होते. या प्रकरणी बदलापूर पूर्व पोलिसांनी सुनीता देवी यांना अटक केली असून पुढील तपास सुरू आहे.
दरम्यान, हत्या केवळ साडीच्या वादातून झाली की त्यामागे अन्य कारणे होती, तसेच या गुन्ह्यात अन्य कोणाचा सहभाग आहे का, याचाही पोलीस तपास करत आहेत.
