नवी मुंबई : महिला जिम पार्टनरचे आक्षेपार्ह व्हिडिओ सोशल मीडियावर व्हायरल करण्याची धमकी देऊन तिच्याकडून ३८ लाख रुपये उकळल्याचा प्रकार घणसोली परिसरात उघडकीस आला आहे. या प्रकरणी रबाळे पोलिसांनी जिम चालक विवेक पाटील याला अटक केली आहे. न्यायालयाने त्याला दोन दिवसांची पोलीस कोठडी सुनावली असून, या प्रकरणाचा पुढील तपास सुरू आहे.
पोलिसांनी दिलेल्या माहितीनुसार, आरोपी आणि पीडित महिला २०२१ पासून एकमेकांच्या परिचयाचे आहेत. दोघेही एकाच जिममध्ये व्यावसायिक भागीदार म्हणून काम करत होते. या ओळखीचा फायदा घेत आरोपीने महिलेची जवळीक साधली. त्यानंतर तिच्याशी वेगवेगळ्या ठिकाणी जबरदस्तीने शारीरिक संबंध प्रस्थापित केल्याचा आरोप आहे. याचदरम्यान आरोपीने महिलेचे आक्षेपार्ह व्हिडिओ मोबाईलमध्ये रेकॉर्ड केल्याचे तक्रारीत नमूद करण्यात आले आहे.
काही काळानंतर आरोपीने या व्हिडिओंचा वापर करून महिलेला धमकावण्यास सुरुवात केली. व्हिडिओ सोशल मीडियावर प्रसारित करण्याची भीती दाखवून त्याने तिच्याकडे वारंवार पैशांची मागणी केली. या धमक्यांद्वारे आरोपीने महिलेकडून तब्बल ३८ लाख रुपये उकळल्याचा आरोप आहे. आरोपीकडून पैशांसाठी सातत्याने दबाव आणला जात असल्याने महिला त्रस्त झाली होती.
वारंवार होणाऱ्या त्रासाला आणि ब्लॅकमेलिंगला कंटाळून अखेर पीडित महिलेने रबाळे पोलीस ठाण्यात धाव घेत तक्रार दाखल केली. तक्रारीची दखल घेत पोलिसांनी तपास सुरू केला आणि आरोपी जिम चालक विवेक पाटील याला अटक केली. त्याला न्यायालयात हजर करण्यात आल्यानंतर दोन दिवसांची पोलीस कोठडी सुनावण्यात आली.
या प्रकरणात आरोपीने कथितरीत्या केलेल्या कृत्यांची, पैशांच्या व्यवहारांची आणि आक्षेपार्ह व्हिडिओंच्या वापराची चौकशी पोलिसांकडून केली जात आहे. या गुन्ह्याचा पुढील तपास रबाळे पोलीस करत आहेत.
