जळगाव : प्रेमसंबंधाला विरोध असल्याने तरुणाने आपल्या भावासह त्याच्या प्रेयसीवर गोळीबार केल्याची घटना जळगाव शहरात घडली आहे. या हल्ल्यात तरुणीच्या डाव्या पायाला गोळी लागल्याने ती गंभीर जखमी झाली असून, तिच्यावर शासकीय वैद्यकीय महाविद्यालय व रुग्णालयात उपचार सुरू आहेत. शहरातील जुन्या बस स्थानक परिसरात मध्यरात्री घडलेल्या या घटनेमुळे परिसरात खळबळ उडाली आहे. याप्रकरणी जळगाव शहर पोलीस ठाण्यात दोन जणांविरुद्ध गुन्हा दाखल करण्यात आला आहे.
मिळालेल्या माहितीनुसार, रात्री साडेबारा वाजण्याच्या सुमारास तरुण आणि त्याची प्रेयसी दुचाकीवरून जुन्या बस स्थानक परिसरातून जात होते. त्यावेळी हल्लेखोरांनी अचानक त्यांच्यावर गोळीबार केला. या हल्ल्यात तरुणीच्या डाव्या पायाला गोळी लागली. ती जखमी झाल्यानंतर तिला तातडीने शासकीय वैद्यकीय महाविद्यालय व रुग्णालयात दाखल करण्यात आले. गोळीबाराच्या घटनेमुळे परिसरात भीतीचे वातावरण निर्माण झाले.
पीडित तरुणीने दिलेल्या फिर्यादीनुसार, तिचे यापूर्वी लग्न झाले होते. तिला १८ आणि १६ वर्षांची दोन मुले आहेत. सुमारे १२ वर्षांपूर्वी तिच्या पतीचे निधन झाले. त्यानंतर ती आपल्या मुलांसह जळगावातील गोपाळपुरा परिसरात राहत आहे. सुमारे चार वर्षांपूर्वी तिची आरोपीच्या भावाशी ओळख झाली. पुढे या ओळखीचे रूपांतर प्रेमसंबंधात झाले आणि दोघांच्या भेटीगाठी वाढल्या.
दरम्यान, या प्रेमसंबंधाची माहिती तरुणाच्या कुटुंबीयांना मिळाल्यानंतर घरातून विरोध सुरू झाला. या संबंधांवरून कुटुंबात वाद होत असल्याचे तक्रारीत नमूद करण्यात आले आहे. याच वादातून तरुणाने आपल्या भावासह त्याच्या प्रेयसीवर गोळीबार केल्याचा आरोप आहे.
या प्रकरणी पीडितेच्या तक्रारीवरून जळगाव शहर पोलिसांनी दोन जणांविरुद्ध गुन्हा दाखल केला आहे. गोळीबारामागील नेमकी परिस्थिती आणि घटनेतील आरोपींच्या भूमिकेबाबत पोलीस पुढील तपास करत आहेत.
