छत्रपती संभाजीनगर : सिडको परिसरातून एक अत्यंत हादरवून टाकणारी घटना समोर आली आहे. व्यावसायिक वादातून आणि अंतर्गत वैमनस्यातून एका 22 वर्षीय तरुणाने आपल्याच 36 वर्षीय मित्राची अत्यंत निर्घृणपणे हत्या केली आहे. भरदिवसा घडलेल्या या थरारामुळे संपूर्ण शहरात एकच खळबळ उडाली आहे.
या घटनेत देवेश उर्फ बंटी चंद्रेश दीक्षित (वय 36) असे मृत तरुणाचे नाव असून, पवन दिलीप पराशर (वय 22) असे आरोपी मित्राचे नाव आहे. मिळालेल्या माहितीनुसार, बंटी आणि पवन यांच्यात मागील काही दिवसांपासून व्यावसायिक कारणावरून तीव्र वाद सुरू होता.
घटनेच्या दिवशी सकाळी बंटी जिममधून आपल्या दुचाकीवरून घरी परतत होता. आधीपासूनच दबा धरून बसलेल्या पवनने सिडको एन-७ परिसरातील मंगेश गॅस एजन्सीजवळ बंटीच्या दुचाकीला मागून भरधाव कारने जोरदार धडक दिली. धडक इतकी भीषण होती की, बंटी हवेत उडून रस्त्यावर कोसळला त्यानंतर कारने 150 फूट लांब त्याला फरफटवत नेलं.
अपघात घडवून आरोपी थांबला नाही, त्याने कारचा यू-टर्न घेतला आणि गंभीर जखमी अवस्थेत रस्त्यावर पडलेल्या बंटीजवळ कार आणली. कारमधून उतरून त्याने हातात असलेल्या लोखंडी रॉडने बंटीच्या डोक्यात व चेहऱ्यावर सपासप वार केले. वर्मी घाव बसल्यामुळे बंटीचा जागीच मृत्यू झाला.
विशेष म्हणजे, हा भयानक थरार घडवल्यानंतर आरोपी पवनने तेथून पळ काढला नाही, तर तो स्वतः कार घेऊन थेट सिडको पोलीस ठाण्यात गेला आणि पोलिसांसमोर आत्मसमर्पण केले. या घटनेमुळे शहराच्या कायदा व सुव्यवस्थेवर मोठे प्रश्नचिन्ह निर्माण झाले असून, सिडको पोलीस या प्रकरणाचा सखोल तपास करत आहेत.
