PMC election news : पुणे : पुण्याच्या राजकारणातून या क्षणाची सर्वात मोठी आणि खळबळजनक बातमी समोर येत आहे. पुण्यातील कुख्यात गुंड गजा मारणेची (Gaja Marne) पत्नी जयश्री मारणे आता थेट निवडणूकीच्या रिंगणात उतरणार असल्याची चर्चा सुरू झाली आहे. विशेष म्हणजे, अजित पवार (Ajit Pawar) यांच्या राष्ट्रवादी काँग्रेसकडून (NCP) जयश्री मारणे यांना मोठी जबाबदारी मिळण्याची शक्यता असून, या एका बातमीने पुण्याच्या राजकीय वर्तुळात मोठी खळबळ उडवून दिली आहे. Pune Politics
उपमुख्यमंत्री अजित पवार यांच्या जिजाऊ निवासस्थानी एबी फॉर्मचे वाटप सुरू असून कार्यकर्ते आणि पदाधिकाऱ्यांनी मोठी गर्दी केली आहे. रुपाली ठोंबरे, माजी आमदार सुनील टिंगरे यांच्यासह अनेक नेते अजित पवारांच्या भेटीसाठी जिजाऊ निवासस्थानी उपस्थित होते.
दरम्यान, अजित पवार गटाकडून कुख्यात गुंड गजा मारणे यांची पत्नी जयश्री मारणे यांना उमेदवारी देण्यात आल्याची माहिती समोर आली आहे. जयश्री मारणे या माजी नगरसेविका असून त्यांना प्रभाग 10 बावधनमधून एबी फॉर्म देण्यात आला आहे. या निर्णयामुळे राष्ट्रवादी काँग्रेसवर टीका होण्याची शक्यता वर्तवली जात आहे. गुन्हेगारी संपवण्याचे वक्तव्य करणाऱ्या अजित पवारांकडून हा निर्णय घेण्यात आल्याने राजकीय वर्तुळात चर्चा सुरू झाली आहे.
अजित दादांची भेट
मिळालेल्या माहितीनुसार, सुमारे 8 दिवसांपूर्वी जयश्री मारणे यांनी बारामती येथील हॉस्टेलमध्ये अजित पवारांची भेट घेतली होती. त्यानंतर त्यांना उमेदवारी दिली जाईल, अशी चर्चा सुरू होती. अखेर आज त्यांच्या नावावर शिक्कामोर्तब झाल्याचे स्पष्ट झाले आहे.
जयश्री मारणे यांनी 2012 साली पुणे महानगरपालिकेची निवडणूक कोथरुडमधून लढवली होती. त्या वेळी त्या मनसेच्या तिकिटावर निवडून आल्या होत्या. पुढे 2022 मध्ये त्यांनी राष्ट्रवादी काँग्रेसमध्ये प्रवेश केला होता. आता त्या अजित पवार गटाकडून अधिकृत उमेदवार म्हणून रिंगणात उतरल्या आहेत.
दरम्यान, पुण्यातील गुन्हेगारी विश्वाशी संबंधित व्यक्तींचा राजकारणातील प्रवेश वाढताना दिसत आहे. यापूर्वी लंडनला पळून गेलेल्या निलेश घायवळच्या भावाने निवडणूक लढवण्याची तयारी दर्शवली होती. तसेच बंदू आंदेकर टोळीतील काही सदस्यांनीही निवडणुकीसाठी न्यायालयात अर्ज केले होते. अशा पार्श्वभूमीवर आता आणखी एका टोळीशी संबंधित व्यक्ती निवडणुकीच्या रिंगणात उतरण्याच्या तयारीत असल्याची चर्चा आहे.
