छत्रपती संभाजीनगर,. ता. 10 : भाजपचे नेते आणि राज्याचे कॅबिनेट मंत्री अतुल सावे यांचे मोठे बंधू आणि पुतणे यांना शेती व रस्त्याच्या वादातून मारहाण झाल्याची धक्कादायक घटना पैठण तालुक्यातील नायगाव खंडेवाडी येथे घडली. या घटनेने परिसरात खळबळ उडाली आहे.
बिडकीन पोलिस ठाण्याच्या हद्दीत ही घटना घडली. अमेय अजित सावे (वय -35) आणि अजित मोरेश्वर सावे (वय-70, रा. खडकेश्वर, छत्रपती संभाजीनगर) अशी जखमींची नावे आहेत.
मिळालेल्या माहितीनुसार, नायगाव खंडेवाडी येथे शेती आणि रस्त्याच्या कामावरून दोन गटांमध्ये वाद निर्माण झाला. वादाचे रूपांतर हाणामारीत झाले आणि यावेळी अमेय सावे व अजित सावे यांना मारहाण करण्यात आली. या घटनेत दोघांच्या डोक्याला दुखापत झाली.
मारहाणीनंतर दोघांना तातडीने बिडकीन येथील ग्रामीण रुग्णालयात उपचारासाठी दाखल करण्यात आले. घटनेची माहिती मिळताच स्थानिक नेते तसेच पोलिसांनी रुग्णालयात धाव घेतली. दोघांवर उपचार सुरू असून पोलिसांकडून त्यांचे जबाब नोंदविण्याचे काम सुरू आहे.
गुन्हा दाखल करण्याची प्रक्रिया सुरू
दरम्यान, या प्रकरणी बिडकीन पोलिसांकडून माहिती घेण्याचे आणि पुढील कायदेशीर कारवाईचे काम सुरू आहे. जखमींच्या जबाबानंतर नेमक्या कोणत्या कलमांखाली गुन्हा दाखल केला जातो, तसेच या मारहाणीमागे नेमका वाद काय होता, हे स्पष्ट होणार आहे. राज्यातील मंत्री अतुल सावे यांच्या कुटुंबातील सदस्यांना मारहाण झाल्याने या घटनेची चर्चा राजकीय वर्तुळातही सुरू झाली आहे. पोलिसांच्या तपासानंतर या प्रकरणातील पुढील चित्र स्पष्ट होणार आहे.
