Beed News : बीड : परळी येथे एका 25 वर्षीय रेल्वे पोलिस कर्मचाऱ्याने गळफास घेऊन आत्महत्या केल्याची दुर्दैवी घटना समोर आली आहे. नितीन पंडित ढगे असे मृत जवानाचे नाव असून ते मूळचे धाराशिव जिल्ह्यातील लोहार येथील रहिवासी होते. नोकरीनिमित्त ते परळीत वास्तव्यास होते. लग्न ठरलेले असताना ही घटना घडल्याने परिसरात हळहळ व्यक्त होत आहे. (Police suicide case)
मिळालेल्या माहितीनुसार, नितीन ढगे यांनी सप्टेंबर 2025 मध्ये रेल्वे पोलिस दलात भरती घेतली होती. नुकताच त्यांचा साखरपुडा पार पडला होता आणि 7 मे रोजी त्यांचा विवाह निश्चित करण्यात आला होता. त्यामुळे त्यांच्या कुटुंबात लग्नाच्या तयारीला सुरुवात झाली होती. घरात आनंदाचे वातावरण असताना अचानक घडलेल्या या घटनेने कुटुंबीयांवर दुःखाचा डोंगर कोसळला आहे.
नितीन हे काही दिवसांपासून सुट्टीवर होते. गुरुवारी ते पुन्हा परळी येथील रेल्वे पोलिस ठाण्यात रुजू झाले होते. त्याच दिवशी त्यांची साप्ताहिक सुट्टी असल्याने ते मोकळ्या वेळेत होते. याच काळात त्यांनी परळीतील माधवबाग परिसरातील एका प्ले रूममध्ये गळफास घेतल्याचे समोर आले आहे.
घटनेची माहिती मिळताच स्थानिक पोलिसांनी घटनास्थळी धाव घेतली आणि मृतदेह ताब्यात घेतला. त्यानंतर उत्तरीय तपासणी परळी उपजिल्हा रुग्णालयात करण्यात आली. प्राथमिक तपासात आत्महत्येमागील कारण स्पष्ट झाले नसून पोलिस अधिक तपास करत आहेत.
या घटनेमुळे नितीन यांच्या सहकाऱ्यांमध्ये आणि परिसरात शोककळा पसरली आहे. त्यांच्या पश्चात तीन भाऊ असा परिवार आहे. लग्नाच्या तयारीत असताना अचानक घडलेल्या या घटनेने संपूर्ण कुटुंब हादरले आहे. या प्रकरणाचा पुढील तपास सुरू असून आत्महत्येमागील कारणाचा शोध पोलिस घेत आहेत.
