Accident News : नांदेड : रस्ते अपघातात आणखी एका मान्यवर व्यक्तीचा जीव गेल्याची दु:खद घटना नांदेडमध्ये घडली आहे. समाजप्रबोधनासाठी कीर्तनाच्या माध्यमातून कार्य करणारे ह.भ.प. मधुकर महाराज बारूळकर यांचा भीषण अपघातात मृत्यू झाला. मंगळवारी सायंकाळी सिडको परिसरात हा अपघात झाला असून त्यांच्या निधनामुळे संपूर्ण मराठवाड्यात हळहळ व्यक्त होत आहे.
मिळालेल्या माहितीनुसार, मधुकर महाराज बारूळकर (रा. बारूळ, ता. कंधार) हे मराठा सेवा संघाच्या संत नामदेव तुकाराम वारकरी परिषदेचे प्रदेश उपाध्यक्ष म्हणून कार्यरत होते. मंगळवारी सिडको परिसरात आयोजित बैठकीसाठी ते नांदेडमध्ये आले होते. बैठक आटोपल्यानंतर सायंकाळी सुमारे 6 वाजण्याच्या सुमारास ते आपल्या दुचाकीवरून गावी परत निघाले होते.
दरम्यान, सिडको भागातील रुबी हॉटेलजवळ ते पोहोचले असता पाठीमागून येणाऱ्या भरधाव हायवा ट्रकने त्यांच्या दुचाकीला जोरदार धडक दिली. अपघात इतका गंभीर होता की मधुकर महाराज यांचा जागीच मृत्यू झाला. या घटनेमुळे परिसरात मोठी खळबळ उडाली.
अपघातानंतर स्थानिक नागरिकांनी तीव्र नाराजी व्यक्त केली आहे. शहरात जड वाहनांवर काही प्रमाणात निर्बंध असतानाही सिडको आणि हडको भागात रेती वाहतूक करणाऱ्या ट्रकची वर्दळ कायम असल्याचे नागरिकांचे म्हणणे आहे. अशा भरधाव वाहनांमुळे यापूर्वीही अपघात घडल्याच्या घटना समोर आल्या आहेत. त्यामुळे अशा वाहनांवर कडक कारवाई करण्याची मागणी नागरिकांकडून होत आहे.
मधुकर महाराज यांनी अनेक वर्षे कीर्तनाच्या माध्यमातून अंधश्रद्धेविरुद्ध जनजागृती केली होती. त्यांच्या कार्यामुळे समाजात सकारात्मक बदल घडवण्याचा प्रयत्न झाला. त्यांच्या निधनामुळे प्रबोधन क्षेत्रात मोठी पोकळी निर्माण झाल्याची भावना व्यक्त केली जात आहे.
