पुणे: पुण्यातून एक धक्कादायक घटना समोर आली आहे. प्रसिद्ध सिंहगड इन्स्टिट्यूटच्या संस्थापक मारुती नवले यांच्यासह संस्थेच्या ७ विश्वस्तांवर पुणे पोलिसांनी गुन्हा दाखल केला आहे. संस्थेतील २७ शिक्षकांचे वेतन थकवून तब्बल 5 कोटी 6 लाख रुपयांचा आर्थिक अपहार केल्याचा आरोप त्यांच्यावर आहे. एका महिला शिक्षिकेने दिलेल्या तक्रारीनंतर भारती विद्यापीठ पोलीस ठाण्यात ही कारवाई करण्यात आली असून, यामुळे शिक्षण क्षेत्रात मोठी खळबळ उडाली आहे.
मिळालेल्या माहितीनुसार, तक्रारदार महिला शिक्षिकेचे गेल्या 5.5 वर्षांचे सुमारे 19 लाख 36 हजार रुपयांचे वेतन संस्थेने थकवले होते. केवळ त्या एका शिक्षिकेचेच नव्हे, तर संस्थेतील एकूण 27 शिक्षकांचे मिळून एकूण 5 कोटी 6 लाख रुपये संस्थेने हडपल्याचा आरोप फिर्यादीत करण्यात आला आहे. हक्काच्या वेतनासाठी अनेकदा मागणी करूनही दाद न मिळाल्याने अखेर त्रस्त शिक्षकांनी पोलिसांकडे धाव घेतली.
या प्रकरणी गुन्हा दाखल झालेल्यांमध्ये संस्थापक मारुती नवले, सचिव सुनंदा नवले, उपाध्यक्ष रचना नवले-अष्टेकर आणि रोहित नवले यांच्यासह एकूण 7 जणांचा समावेश आहे. फसवणूक आणि आर्थिक अफरातफरीच्या विविध कलमांखाली हा गुन्हा नोंदवण्यात आला आहे. भारती विद्यापीठ पोलीस ठाण्याचे वरिष्ठ पोलीस निरीक्षक मानसिंग पाटील यांच्या मार्गदर्शनाखाली पोलीस पथक आता या प्रकरणाचा सखोल तपास करत आहे.
