पुणे : परतीच्या पावसाने गेले काही दिवस झाले जोर पकडला आहे. राज्यात पुन्हा पावसाचा धुमाकूळ बघायला मिळणार आहे. राज्यात परतीच्या पावसाचा मुक्काम वाढल्याचे दिसत आहे. हवामान विभागाच्या अंदाजानुसार, कोकण, मध्य महाराष्ट्र आणि मराठवाड्यात आज वादळी वारे आणि विजांसह पाऊस पडण्याची शक्यता वर्तवण्यात आली. तर, उर्वरित महाराष्ट्रात हलक्या पावसाच्या सरींसह उन्हाचा चटका जाणवू शकतो.
सप्टेंबर महिन्याच्या अखेरीस राज्यात परतीच्या पावसाला सुरुवात झाली होती. मात्र, ऑक्टोबरच्या पहिल्या आठवड्यात मौसमी वाऱ्यांची चाल थबकली. त्यामुळे राज्यातील कमाल आणि किमान तापमानात मोठी वाढ झाली. अनेक जिल्ह्यांमधील तापमानाचा पारा 35 अंशाचा पार गेला. उन्हाचा चटका जाणवू लागला. मात्र, मौसमी वाऱ्यांनी पुन्हा परतीचा प्रवास सुरु केल्याने राज्यात ढगाळ वातावरण तयार झालं असून ठिकठिकाणी मुसळधार पाऊस पडत आहे.
हवामान विभागाने वर्तवलेल्या अंदाजानुसार, आज सिंधुदुर्ग, सातारा, कोल्हापूर येथे जोरदार वादळी पावसाची शक्यता आहे. तर, पालघर, ठाणे, मुंबई, रायगड, रत्नागिरी, नगर, पुणे, सांगली, सोलापूर, बीड, धाराशिव, लातूर वादळी वारे आणि विजांसह पाऊस पडू शकतो.याशिवाय, मराठवाड्यात तुरळक ठिकाणी हलक्या पावसाचा अंदाज हवामान विभागाने वर्तविला आहे.
