रोहा, (रायगड) : शहरालगतच्या धामणसई आदिवासी वाडीवरील वृद्ध महिलेच्या हत्येने रोहा तालुका पुन्हा हादरला. धामणसई आदिवासी वाडीवरील लक्ष्मी रामा वाघमारे (वय – ६०) या वृद्ध महिलेची निर्घृण हत्या झाल्याची घटना समोर आली. या घटनेने तालुक्यात एकच खळबळ उडाली.
झोपडीपासून काही अंतरावरील जंगल पायवाटेवर महिलेचा मृतदेह आढळून आला. महिलेला खाली पाडून, तोंड जमिनीत दाबून ठार मारले, असा प्राथमिक अंदाज पोलिसांनी व्यक्त केला. महिलेच्या डोक्यावर दगड ठेवलेला आढळून आल्याने खुनाचा गंभीर प्रकार असल्याचे बोलले जात आहे.
रोहा शहर लगतच्या धामणसई आदिवासी वाडीतील लक्ष्मी वाघमारे या महिलेची हत्या निर्घृणपणे करण्यात आली. महिलेच्या खुनाबाबत रोहा पोलीस ठाण्यात अज्ञात आरोपी विरोधात गुन्हा खुनाचा दाखल करण्यात आला आहे. महिलेच्या हत्येची घटना समजताच अप्पर पोलीस अधीक्षक अतुल झेंडे यांनी तातडीने घटनास्थळी भेट देऊन स्थळाची पाहणी केली.
तपासासाठी पाच पथके तयार..
खुनाच्या तपासासाठी पाच तपास पथके तयार करण्यात आली आहे. तपासाचा वेग वाढवला असून, त्यादृष्टीने तपास सुरू आहे. लवकर यातील आरोपींना अटक केली जाईल. त्यानंतर या खुनाचे कारण स्पष्ट होईल, असे सांगितले जात आहे.
