Pune Youth Death: कणकवली : कणकवली (Kankavali) शहरातून एक धक्कादायक घटना समोर आली असून मध्यवर्ती बस स्थानकासमोर असलेल्या उत्कर्षा लॉजमध्ये 35 वर्षीय तरुण मृतावस्थेत (Pune Youth Death) आढळला आहे. या घटनेमुळे कणकवलीसह संपूर्ण सिंधुदुर्ग जिल्हा परिसरात खळबळ उडाली आहे. मृत तरुणाचे नाव अलंकार अशोक नाईक असून तो पुणे येथील कर्वेनगर भागातील रहिवासी आहे.
मिळालेल्या माहितीनुसार, अलंकार नाईक हा 13 फेब्रुवारी रोजी कणकवली येथे आला होता. त्याने बस स्थानकासमोरील उत्कर्षा लॉजमध्ये राहण्यासाठी खोली बुक केली होती. गेल्या दोन दिवसांपासून तो याच लॉजमध्ये वास्तव्यास होता. सोमवारी सकाळी सुमारे 8 वाजण्याच्या सुमारास लॉजचा कर्मचारी खोलीचे भाडे विचारण्यासाठी त्याच्या खोलीकडे गेला. दरवाजा ठोठावूनही आतून कोणताही प्रतिसाद मिळाला नाही. अनेक वेळा हाका मारूनही दरवाजा न उघडल्याने संशय बळावला.
यानंतर कर्मचाऱ्याने तातडीने लॉजच्या मालकांना ही माहिती दिली. मालकांनी त्वरित कणकवली पोलिसांशी संपर्क साधला. पोलिस घटनास्थळी दाखल झाल्यानंतर दरवाजा उघडण्यात आला. खोलीत प्रवेश केल्यानंतर अलंकार नाईक हा निपचित अवस्थेत आढळला. त्याला तातडीने कणकवली उपजिल्हा रुग्णालयात नेण्यात आले. मात्र डॉक्टरांनी तपासणी करून त्याला मृत घोषित केले.
पोलिसांच्या प्राथमिक पाहणीत मृतदेहाजवळ कोणतीही मोठी झटापट झाल्याची स्पष्ट चिन्हे आढळली नाहीत. मात्र मृताच्या दोन्ही हातांच्या मुठी घट्ट आवळलेल्या अवस्थेत असल्याचे पोलिसांच्या निदर्शनास आले आहे. त्यामुळे हा मृत्यू नैसर्गिक आहे की अन्य कोणत्या कारणामुळे झाला, याबाबत संशय व्यक्त केला जात आहे.
मृत तरुणाच्या कुटुंबीयांना या घटनेची माहिती देण्यात आली आहे. शवविच्छेदन अहवालानंतरच मृत्यूचे नेमके कारण स्पष्ट होणार असल्याचे पोलिसांनी सांगितले आहे. सध्या या प्रकरणाचा अधिक तपास सुरू असून सर्व शक्यता लक्षात घेऊन पोलिस तपास करत आहेत.
