मुंबई: 2026 सालातील पहिल सूर्यग्रहण (Surya Grahan 2026) आज दिसणार आहे. खगोलप्रेमींसाठी ही एक दुर्मिळ दृश्य पर्वणी असली, तरी सामान्य नागरिकांसाठी ग्रहण आणि त्यासोबत येणाऱ्या ‘सुतक’ काळ महत्वाचा असतो.
हे ग्रहण आज दुपारी 3 वाजून 26 मिनिटांनी सुरू होईल आणि रात्री 7 वाजून 57 मिनिटांनी संपेल. जेव्हा चंद्र सूर्य आणि पृथ्वीच्या मध्ये येतो, तेव्हा तो सूर्याचा 93 ते 96 टक्के भाग झाकून टाकतो. यामुळे सूर्याची केवळ बाहेरील कडा एखाद्या तेजस्वी अंगठीसारखी चमकताना दिसते. हे मनमोहक दृश्य साधारण सव्वा दोन मिनिटे अनुभवायला मिळेल.
महत्त्वाची गोष्ट अशी की, हे सूर्यग्रहण प्रामुख्याने दक्षिण आफ्रिका, अंटार्क्टिका आणि दक्षिण अमेरिकेच्या काही भागांतून दिसणार आहे. हे ग्रहण भारतातून दिसणार नाही. शास्त्रानुसार, ग्रहण ज्या भूभागावर दिसत नाही, तिथे सुतक पाळण्याची गरज नसते.
ज्योतिषशास्त्रानुसार हे ग्रहण कुंभ राशीत आणि धनिष्ठा नक्षत्रात लागत आहे. सूर्य हा ऊर्जा आणि आत्मबलाचा कारक मानला जातो. जरी हे ग्रहण भारतात दिसत नसले, तरी राशीचक्रावर त्याचे सूक्ष्म परिणाम जाणवू शकतात, असे काही अभ्यासकांचे मत आहे.
