Khed News खेड, ता. ७ : अल्पवयीन बालिकेवर लैंगिक अत्याचार केल्याच्या गंभीर प्रकरणात खेड येथील न्यायालयाने आरोपी रोहन शंकर पालकर (वय २३, रा. खारी-सुसेरी, ता. खेड) याला दोषी ठरवत २० वर्षे सश्रम कारावासाची कठोर शिक्षा सुनावली आहे. या निकालामुळे समाजात बालकांवरील अत्याचारांविरोधात कठोर संदेश गेला असून पीडितेला न्याय मिळाल्याची भावना व्यक्त होत आहे. पी. एस. चांदगुडे, जिल्हा न्यायाधीश-१ तथा अतिरिक्त सत्र न्यायाधीश यांनी ६ मे २०२६ रोजी हा महत्त्वपूर्ण निकाल दिला. Khed News
कोविड काळात घडलेल्या या घटनेत पीडित बालिका ऑनलाईन शिक्षणासाठी आपल्या मैत्रिणीच्या घरी गेली होती. त्यावेळी घरात कोणी नसल्याचा फायदा घेत आरोपीने तिच्यावर जबरदस्तीने अत्याचार केला. तसेच हा प्रकार कुणालाही सांगितल्यास पीडिता व तिच्या कुटुंबाला जीवे मारण्याची धमकी दिली होती. भीतीमुळे पीडिता बराच काळ गप्प राहिली. मात्र, काही शारीरिक बदल जाणवल्यानंतर आईने तिला वैद्यकीय तपासणीसाठी नेले असता संपूर्ण प्रकार उघडकीस आला. त्यानंतर खेड पोलीस ठाणे येथे गुन्हा दाखल करण्यात आला होता. Khed News
न्यायालयाने आरोपीला भारतीय दंड विधान कलम ३७६, ५०६ तसेच POCSO Act अंतर्गत विविध कलमान्वये दोषी धरले. कलम ३७६ आणि पोक्सो कलम ४ व ६ अंतर्गत आरोपीला २० वर्षे सश्रम कारावास आणि ५ हजार रुपयांचा दंड ठोठावण्यात आला. दंड न भरल्यास अतिरिक्त १५ दिवसांचा कारावास भोगावा लागणार आहे. तसेच पोक्सो कायद्याच्या कलम ८, १० आणि १२ अंतर्गत अनुक्रमे ३ वर्षे, ५ वर्षे आणि १ वर्ष सश्रम कारावासाची शिक्षा सुनावण्यात आली आहे. Khed News
या खटल्यात सरकार पक्षाने एकूण ११ साक्षीदार तपासले. पीडितेची साक्ष आणि वैद्यकीय तपासणीत आलेला डीएनए अहवाल हे आरोपीविरोधातील महत्त्वाचे पुरावे ठरले. सरकारी वकील मृणाल जाडकर यांनी सरकार पक्षाची बाजू प्रभावीपणे मांडली.
या प्रकरणाचा तपास महिला पोलीस उपनिरीक्षक सोनाली झेंडे यांनी केला, तर कोर्ट पैरवीसाठी चंद्रमुनी ठोके यांनी सहकार्य केले. सर्व पुरावे आणि साक्षींचा सखोल विचार करून न्यायालयाने आरोपीला दोषी ठरवत कठोर शिक्षा सुनावली. या निकालाचे विविध स्तरांतून स्वागत होत असून, बालकांवरील अत्याचारांविरोधात न्यायव्यवस्थेने पुन्हा एकदा कठोर भूमिका स्पष्ट केली आहे.
