दौंड, ता. 10 : दोन दुचाकींवरून आलेल्या 6 अनोळखी सशस्त्र दरोडेखोरांच्या टोळीने घरात घुसून दहशत माजवत दरोडा टाकल्याची घटना घडली. दरोड्याचा प्रयत्न उधळण्यासाठी पुढे आलेल्या धाडसी तरुणाच्या डोक्यात दरोडेखोरांनी लोखंडी शस्त्राने कडक वार करून त्याला रक्ताच्या थारोळ्यात पाडले आणि घरातील सोन्याचे मंगळसूत्र व मोबाईल लुटून अंधाराचा फायदा घेत पोबारा केला. दौंड तालुक्यातील मलठण परिसरात ही घटना घडली.
मिळालेल्या माहितीनुसार, बुधवारी (ता. 09) मध्यरात्री अडीच वाजण्याच्या सुमारास मौजे मलठण हद्दीतील दळवीवस्ती येथे राहणारे शेतकरी भगवान पांडुरंग दळवी यांच्या राहत्या घरावर दरोडेखोरांनी निशाणा साधला. दोन मोटारसायकलवरून आलेल्या 6 अनोळखी दरोडेखोरांनी चोरी करण्याच्या उद्देशाने थेट घरात घुसखोरी केली.
यावेळी मुलगा स्वप्नील दळवी याने दरोडेखोरांचा प्रतिकार केला आणि त्यांना अडवण्याचा प्रयत्न केला. मात्र, दरोडेखोरांनी स्वप्नीलच्या डोक्यात लोखंडी हत्याराने प्रहार केला. या जीवघेण्या हल्ल्यात स्वप्नील गंभीर जखमी झाला. त्यानंतर दरोडेखोरांनी घरात धुमाकूळ घालत घरातील दोन मोबाईल फोन आणि भावजय साधना दळवी यांच्या गळ्यातील सोन्याचे मणी-मंगळसूत्र जबरीने हिसकावून चोरून नेले.
याप्रकरणी भगवान पांडुरंग दळवी यांनी दिलेल्या फिर्यादीवरून दौंड पोलीस ठाण्यात 6 अनोळखी चोरट्यांविरुद्ध विविध कलमान्वये गुन्हा नोंदवण्यात आला आहे. घटनेची माहिती मिळताच पोलिसांनी घटनास्थळी धाव घेऊन पाहणी केली. या प्रकरणाचा पुढील कडक तपास पोलीस उपनिरीक्षक लोकरे करत आहेत.
