पुणे : बुलढाणा अर्बन को-ऑपरेटिव्ह क्रेडिट सोसायटीमध्ये तब्बल 34 कोटी 77 लाख रुपयांची मोठी आर्थिक फसवणूक झाल्याचा धक्कादायक प्रकार समोर आला आहे. या प्रकरणी संस्थेचे माजी मुख्य कार्यकारी अधिकारी शिरीष दिनकर देशपांडे (वय 68) आणि विभाग व्यवस्थापिका योगिनी योगेश पोकळे (वय 44) यांच्यासह इतर सहकाऱ्यांवर पुण्यातील डेक्कन पोलीस ठाण्यात गुन्हा दाखल करण्यात आला आहे. सोसायटीचे वैधानिक लेखापरीक्षक मोहन रघुनाथ दलाल (वय 51) यांनी यासंदर्भात अधिकृत फिर्याद दिली आहे.
काय आहे नेमके प्रकरण?
हा संपूर्ण गैरव्यवहार 1 जानेवारी 2018 ते 15 डिसेंबर 2025 या कालावधीत घडला. शिरीष देशपांडे हे पश्चिम विभागाचे मुख्य कार्यकारी अधिकारी असताना आणि योगिनी पोकळे या विभाग व्यवस्थापक पदावर कार्यरत असताना त्यांनी आपल्या अधिकाराचा गैरवापर केला. सुरुवातीला लेखापरीक्षणात संशयास्पद बाबी आढळल्याने डिसेंबर 2025 मध्ये दोघांनाही नोकरीवरून काढून टाकण्यात आले होते. त्यानंतर संस्थेने खात्यांचे फॉरेन्सिक ऑडिट करून घेतले, ज्यामध्ये कोट्यवधी रुपयांचा घोटाळा उघडकीस आला.
तपासात आणि ऑडिट अहवालात आरोपींनी केलेले विविध गैरप्रकार समोर आले आहेत.संचालक मंडळाची कोणतीही परवानगी न घेता नियमबाह्य रीतीने कर्जे मंजूर केली. तारण न घेता कर्जे देणे आणि परस्पर व्याज माफ करण्याचे प्रकार केले.आरोपींनी स्वतःसाठी 0% व्याजदराने कर्जे घेतली.
‘बुलढाणा अर्बन मॅनेजमेंट सर्व्हिसेस प्रा. लि.’ या कंपनीला बेकायदेशीरपणे अॅडव्हान्स दिले आणि ही संस्था बँकेची उपकंपनी असल्याचे दाखवले. यासाठी संस्थेचे संस्थापक अध्यक्ष राधेश्याम चांडक यांची बनावट स्वाक्षरी करून सदस्यत्व नोंदवले व नंतर रद्द केले.ROC च्या संकेतस्थळावर खोटी ताळेबंद पत्रके अपलोड केली. तारण मालमत्तांच्या विक्रीतून आलेली रक्कम सोसायटीत जमा केली नाही. तसेच कर्जदारांच्या नकळत त्यांच्या खात्यात अतिरिक्त पैसे टाकून ते इतरत्र वळवले.
संचालक मंडळाला अंधारात ठेवून मालमत्ता खरेदी करणे आणि देखभालीचा अफाट खर्च दाखवून या दोघांनी संस्थेचे मोठे आर्थिक नुकसान केले. या तक्रारीची शहानिशा केल्यानंतर पोलिसांनी गुन्हा नोंदवला असून, सध्या आर्थिक गुन्हे शाखेचे पोलीस उपनिरीक्षक सुहास पाटील या प्रकरणाचा पुढील तपास करत आहेत.
