अलिबाग : रायगड जिल्ह्यातील अलिबाग तालुक्यातील किहीम या गावातून हृदय पिळवटून टाकणारी घटना समोर आली आहे. विवाहबाह्य प्रेमसंबधांला अडथला येणाऱ्या पोटच्या मुलींची आईनेच गळा दाबून खून केल्याची धक्कादायक घटना उघडकीस आली आहे. या प्रकरणी मांडवा सागरी पोलीस ठाण्यात गुन्हा दाखल करून स्थानिक गुन्हे शाखेने सदर महिलेला अटक केली आहे. शितल पोले असं अटक करण्यात आलेल्या महिलेचे नाव आहे.
याबाबत अधिक माहिती अशी कि, ३१ मार्च रोजी सायंकाळी पावणे आठ वाजण्याच्या सुमारास आराध्या पोळे (वय-५) आणि सार्थक पोळे (वय-३) या दोन मुलांचा संशयास्पद मृत्यू झाल्याची घटना समोर आली होती. दोन्ही मुलांना जिल्हा रुग्णालयात दाखल केले तेव्हा पोलीसांनी मृत घोषित केले होते. दोन्ही मुलांच्या संशयास्पद मृत्यू नंतर पोलीसांनी दोन्ही चिमुकल्यांचे मृतदेह शवविच्छेदनासाठी मुंबईतील जे. जे रुग्णालयात पाठवले होते.
या प्रकरणाची मांडवा पोलीसांनी आकस्मात मृत्यूची नोंद करून तपास सुरू केला होता. दरम्यान, पोलिसांना दोन्ही मुलांचा मृत्यू हा नैसर्गिक नसून तो घातपात असावा असा संशय होता. त्यानुसार पोलीस निरिक्षक बाळासाहेब खाडे, सहाय्यक पोलीस निरीक्षक भास्कर जाधव आणि पोलीस उपनिरीक्षक धनाजी साठे यांनी इतर कर्मचाऱ्यांसह चौकशीला सुरवात केली.
या चौकशी दरम्यान दोन्ही मुलांचे वडील सदानंद पोळे घटनेच्या दिवशी दुपारी आठवडी बाजाराला गेले होते. ते घरी आल्यानंतर मुलांची आई शितल पोळे ही घरासमोर भांडी साफ करत होती. त्यांनी मुलांबाबत विचारलं असता मुले झोपली असल्याचे तिने सांगितले. वडीलांनी मुलांना उठवण्याचा प्रय़त्न केला, मात्र ती उठली नाहीत अशी माहिती वडीलांनी पोलीसांना दिली.
पोलीसी हिसका दाखवताच आईने दिली कबूली
घटना घडली त्या दिवशी मुले घराबाहेर गेली नव्हती. बाहेरूनही कोणी घरी आले नव्हते. त्यामुळे पोलीसांचा संशय अधिकच बळवला. घटनेच्या वेळी मुलांची आई एकटीच घरी होती. त्यामुळे पोलीसांनी तिची कसून चौकशी केली. सुरूवातीला तीने कुठलीच माहिती नसल्याचा बनाव केला. मात्र, पोलिसांनी पोलीसी हिसका दाखवताच, आईने कबूली दिली.
मुलांच नाक, तोंड दाबून केला खून
शितल पोळे हीचे लग्नापुर्वी एका तरुणाशी प्रेमसंबध होते. तो लग्नानंतरही शितलला भेटत होता. यावरून दोघामध्ये भांडणे होत होती. शितला आपल्या प्रियकरा सोबत पळून जायचे होते. त्यासाठी तीने प्रियकराला लग्नही करू दिले नव्हते. पण पळून जाण्यात आराध्या आणि सार्थक ही मुले अडसर ठरत होती. त्यामुळे आपल्या दोन्ही मुलांचा नाक आणि तोंड दाबून खून केला.
