मुंबई: महाराष्ट्रातील अनेक भागात अवकाळी पावसाची हजेरी लावली आहे. अरबी समुद्रात कमी दाबाचा पट्टा निर्माण झाल्याने कोकणात अवकाळी पाऊस सुरु आहे. रत्नागिरी, सिंधुदुर्ग जिल्ह्यात अवकाळी पावसाची हजेरी दिसून येत आहे. सोमवारी कोकणात मुसळधार पाऊस झाल्याने शेतकऱ्यांची चिंता वाढली आहे. सिंधुदुर्गात मंगळवारी पहाटे सर्वत्र अवकाळी पावसाने हजेरी लावली. या अवकाळी पावसामुळे आंबा, काजू उत्पादक शेतकरी अडचणीत आले आहेत. ऐन फुलोऱ्यावर आलेली आंबा, काजू पीक धोक्यात आले आहे. अवकाळी पाऊस पडल्याने किडींचा प्रादुर्भाव होण्याची शक्यता तर आंबा आणि काजु पिकाला आलेला मोहोर गळून पडण्याची भीती शेतकऱ्यांना सतावत आहे.
सिंधुदुर्ग जिल्ह्यातील बहुतांश भागात गेल्या 24 तासांपासून अवकाळी पाऊस सुरु आहे. सावंतवाडी आणि कणकवली तालुक्यातील काही भागाला अवकाळी पावसाचा तडाखा बसला आहे. वादळी वाऱ्यासह अवकाळी पावसाने दोडामार्ग तालुक्याला झोपडपून काढलं असून तालुक्यात सोमवारी रात्रीपासून अवकाळी पाऊस सुरू आहे.
दरम्यान बदलत्या वातावरणाचा आंबा, काजू पिकाला मोठा फटका बसण्याची शक्यता आहे. रत्नागिरी आणि सिंधुदुर्ग जिल्ह्यातल्या अनेक भागात मध्यरात्री जोरदार पाऊस झाला. काही भागांमध्ये जोरदार तर काही भागांमध्ये रिमझिम पाऊस सुरु असल्याने शेतकऱ्याची चिंता वाढली आहे. पुढील 24 तास कोकणासह राज्याच्या विविध भागात पावसाची शक्यता वर्तवण्यात आली आहे. कोकणात आज 9 जानेवारीला विजांच्या गडगडाटासह मुसळधार पावसाची शक्यता आहे.
रत्नागिरी जिल्ह्यातील काही तालुक्यात मुसळधार, तर चिपळूण, संगमेश्वर भागांत रिमझिम पाऊस सुरु आहे. जोरदार पावसामुळे तालुक्यातील काही गावांतील विद्युत पुरवठा खंडीत झाला आहे. ऐन थंडीच्या वातावरण असताना पावसाच्या सरी कोसळत आहे. वातावरणातील बदलामुळे आंबा, काजू पीकाला याचा फटका बसू शकतो. सकाळी महाबळेश्वर परिसरात एक तास तुरळक पाऊस पाहायला मिळाला. अवकाळी पावसाचा स्ट्रॉबेरी पिकाला फटका बसण्याची शक्यता आहे. स्ट्रॉबेरीवर काळे डाग आणि रोग पडण्याची दाट शक्यता असल्याने शेतकरयांची चिंता वाढली आहे.
