कर्जत: राष्ट्रवादी काँग्रेस पक्षामध्ये फूट पडून आता जवळपास चार महिने उलटले. सध्या केंद्रीय निवडणूक आयोगासमोर पक्ष व पक्षचिन्ह कुणाचं? यासंदर्भात सुनावणीही सुरु आहे. मात्र, यादरम्यान उपमुख्यमंत्री अजित पवारांनी खासदार शरद पवारांवर गंभीर आरोप केले आहेत. कर्जतमध्ये शिबिरात केलेल्या भाषणात अजित पवारांनी राष्ट्रवादी काँग्रेसमधील फुटीबाबत सविस्तर भाष्य केलं आहे. यामध्ये अजित पवारांनी थेट शरद पवारांना लक्ष्य केलं. शरद पवारांचा राजीनामा आणि त्यानंतरत्या घडामोडींवर त्यांनी यावेळी आपली भूमिका मांडली.
अजित पवार म्हणाले, “आम्हाला सातत्यानं गाफील ठेवण्यात आलं. प्रफुल पटेल, मी, छगन भुजबळ, सुनील तटकरे, जयंत पाटील, अनिल देशमुख, रामराजे नाईक निंबाळकर, दिलीप वळसे पाटील, धनंजय मुंडे असे आम्ही १० ते १२ जण देवगिरीवर बैठकीसाठी बसलो होतो. सरकारमध्ये जाण्याबाबत शरद पवारांना थेट सांगितलं, तर त्यांना काय वाटेल? असा विचार होता. म्हणून आम्ही तिथे सुप्रियाला बोलवून घेतलं. तिला काहीच सांगितलं नाही की, आम्ही सर्वजण आहोत. तिला सांगितलं की, हे सर्व जीवाभावाचे सहकारी आहेत. लोकशाहीत बहुमताला आदर द्यावा लागतो, तर संघटना पुढे जाते. सगळं ऐकल्यानंतर तिनं सांगितलं की मला सात दिवस द्या. मी साहेबांना राजी करते. आम्ही १० दिवस थांबलो. तेव्हा जयंत पाटील, अनिल देशमुखही तिथे होते”, असा दावा अजित पवारांनी आपल्या भाषणात केला.
दरम्यान, खासदार सुप्रिया सुळेंना दिलेली मुदत उलटल्यानंतर थेट शरद पवारांना सर्वच सांगितल्याचं अजित पवार यावेळी म्हणाले. “त्यानंतर आम्ही सर्वजण थेट शरद पवारांकडे गेलो. त्यांनी सगळं ऐकलं. ते म्हणाले ठीक आहे. बघू आपण काय करायचं ते. नंतर आम्ही यशवंतराव चव्हाण प्रतिष्ठानला चर्चा केली. मी म्हटलं की वेळ जातोय. लवकर काय तो निर्णय घ्या”, असं अजित पवार म्हणाले.
दरम्यान, पुस्तक प्रकाशन समारंभाच्या एक दिवस आधीच राजीनामा देण्याचा निर्णय झाला होता, असं उपमुख्यमंत्री अजित पवार म्हणाले. “१ मे रोजी मला शरद पवारांनी बोलवून सांगितलं की, आता सरकारमध्ये जा. मी अध्यक्षपदाचा राजीनामा देतो. इतर कुणालाही याची माहिती नव्हती. घरातल्या फक्त चौघांना माहिती होतं. ते राजीनामा देणार होते. तशा प्रकारे त्यांनी राजीनामा दिला. त्यांनी १५ लोकांची कमिटी तिथेच जाहीर केली आणि सांगितलं की, त्यांनी बसावं आणि अध्यक्ष निवडावा. मग सगळे आश्चर्यचकित झाले. तिथेच वातावरण बदललं. ते घरी गेल्यानंतर वेगवेगळ्या लोकांनी वेगवेगळी प्रतिक्रिया दिली”, असं अजित पवारांनी नमूद केलं.
“माजी खासदार आनंद परांजपे आणि आमदार जितेंद्र आव्हाडांना शरद पवारांनी बोलवून घेतलं आणि त्यांना सांगितलं की उद्यापासून चव्हाण प्रतिष्ठानला काही लोक, महिला व युवक पाहिजे. त्यांनी तिथे आंदोलन करून मागणी करायची की पवारसाहेब राजीनामा परत घ्या. मला मात्र, हे कळलंच नाही की का? राजीनामा द्यायचा नव्हता तर नाही म्हणायचं. मग हे रोज जाऊन आंदोलनाला बसायचे. ठराविकच टाळकी होती तिथे. जितेंद्र सोडला तर एकही आमदार नव्हता तिथे. आम्हालाही कळेना. मला एक सांगतायत, तिथे दुसरंच सांगतायत”, असा खळबळजनक दावा अजित पवारांनी यावेळी केला.
“त्यानंतर शरद पवार यांनी राजीनामा मागे घेतला गेला. आम्हाला सांगितलं की, सुप्रियाला माझ्यानंतर राष्ट्रीय अध्यक्ष करा. सगळ्या गोष्टी ठरल्या होत्या. सगळ्यांनी तयारी दाखवली. ही धरसोड वृत्ती, गाफील ठेवणं बरोबर नाही. हे मला पटत नाही. तुम्ही एकदा काय ते ठरवा. एक घाव दोन तुकडे, विषय संपला”, असंही अजित पवार म्हणाले.
