रत्नागिरी: दहावीतील मुलीवर लैंगिक अत्याचार केल्याची धक्कादायक घटना रत्नागिरीमधील कोकरे गावात घडली आहे. दहावीच्या वर्गात शिक्षण घेत असलेल्या अल्पवयीन मुलीवर सामूहिक अत्याचार केल्याची घटना उघडकीस आली. या मुलीवर अत्याचार केल्यानंतर तिला एका निर्जनस्थळी बेशुद्ध अवस्थेत सोडून देण्यात आले होते. मात्र, पोलिसांनी तपासाची सूत्रे जलद गतीने हलवत दोघांना अटक केली असून पॉक्सोअंतर्गत गुन्हा दाखल केला आहे. सध्या पीडितेची प्रकृती गंभीर असून तिच्यावर खासगी रुग्णालयात उपचार सुरू आहेत.
कोकरे गावातील या धक्कादायक प्रकाराने रत्नागिरी जिल्ह्यात एकच खळबळ उडाली आहे. घटनेबद्दल संतप्त प्रतिक्रिया समोर येत आहेत. सूत्रांनी दिलेल्या माहितीनुसार पीडित मुलीवर लैंगिक अत्याचार करण्यात गावातील तरुणांचा समावेश असल्याचे सांगितले जात आहे. या घटनेचा तपास सावर्डे पोलीस करत असून पीडित ही अल्पसंख्याक समाजातील असल्याने सामाजिक तणाव हाताळण्याचे मोठे आव्हान देखील पोलिसांसमोर आहे. प्रकृती गंभीर असल्याने पीडित मुलीवर खासगी रुग्णालयात उपचार सुरू आहेत.
