Kolhapur News कोल्हापूर : सख्खे भाऊ पक्के वैरी अशी म्हण आपल्या परिचित आहे. कारण एकाच एकाच आईच्या पोटातून आलेले दोन भाऊ एकमेकांचे वैरी झाल्याची उदाहरणे आपण पाहिली आहेत. क्वचितच अनोख्या सख्ख्या दोन भावांच्या प्रेमाची गोष्ट आपण ऐकतो. अशीच एक घटना समोर आल्याने डोळ्यात पाणी आल्याशिवाय राहणार नाही.
अवघ्या पाच मिनिटांच्या अंतराने मृत्यू….!
कोल्हापूर जिल्ह्यातील राधानगरी तालुक्यात आयुष्यभर जिवलग मित्र राहिलेल्या दोन सख्ख्या भावांची अवघ्या पाच मिनिटांच्या अंतराने मनाला चटका लावणारी ‘एक्झिट’ झाली.
राधानगरी तालुक्यातील ठिकपूर्लीमधील विलास बाबुराव भंडारी (वय 81) व जयसिंग बाबुराव भंडारी (वय 63) या दोन सख्ख्या भावांचा अवघ्या पाच मिनिटांच्या अंतराने मृत्यू झाला. त्यामुळे चौघा भावांमधील दोन भावांची अशा पद्धतीने एक्झिट झाल्याने हळहळ व्यक्त करण्यात येत आहे. दोघा भावांनी बंधूप्रेम जपल्याने आणि मृत्यूही अशा पद्धतीने आल्याने गावही हळहळले.
ठिकपूर्लीमधील विलास, जयसिंग मुरलीधर व प्रल्हाद हे सख्खे बंधू आहेत. अत्यंत आव्हानात्मक परिस्थितीमध्ये कापड व्यवसायात आपले स्थान निर्माण केले आहे. व्यवसायासोबत त्यांनी एकत्र कुटुंबही तितक्याच ताकदीने जपल्याने चौघा भावांमधील स्नेह नेहमी दिसून येत असे. मात्र, चौघांमधील दोघा भावांचा एकाच दिवशी झालेल्या मृत्यूने त्यांच्यावर दु:खाचा डोंगर कोसळला. शनिवारी 8 एप्रिल रोजी दुपारी जयसिंग यांचे आकस्मिक निधन झाले. त्यांच्या निधनाने धक्का बसल्याने अवघ्या पाच मिनिटांमध्ये थोरले बंधू विलास यांना जगाचा निरोप घेतला.
