मुंबई: राज्यातील अन्नपदार्थांमधील भेसळ आणि नियमांचे उल्लंघन रोखण्यासाठी अन्न व औषध प्रशासनाने (FDA) कारवाईचा वेग वाढवला आहे. आयुक्त तुकाराम मुंढे यांच्या निर्देशानुसार राज्यभरात तपासणी मोहीम राबवली जात असून, दोषी आढळणाऱ्या विक्रेत्यांवर कठोर कारवाई केली जात आहे. या मोहिमेत आतापर्यंत सुमारे 2.23 कोटी रुपये किमतीचा अन्नसाठा जप्त करण्यात आला आहे. तसेच 23 आस्थापनांचे परवाने निलंबित करण्यात आले असून, 8 विनानोंदणी विक्रेत्यांचा व्यवसाय बंद करण्यात आला आहे.

या कारवाईत ठाणे जिल्ह्यातील भिवंडी येथे गंभीर प्रकार समोर आला. आयात केलेल्या अन्नपदार्थांच्या पाकिटांवरील उत्पादन तारीख, मुदत संपण्याची तारीख आणि कमाल किरकोळ विक्री किंमत (MRP) थिनरच्या मदतीने पुसून त्यावर नव्याने छपाई केली जात असल्याचे आढळले. या प्रकरणी संबंधित कंपनीचा 2.06 कोटी रुपयांचा माल जप्त करण्यात आला.
पुण्यातील जे. एम. रोडवरील खाऊ गल्लीत तपासणीदरम्यान 8 विक्रेते विनानोंदणी व्यवसाय करत असल्याचे आढळले. प्रशासनाने त्यांचा व्यवसाय बंद केला असून, त्यांच्याकडून 2.40 लाख रुपयांचा दंड वसूल केला आहे. याशिवाय पुण्यासह राज्यातील विविध भागांत 23 आस्थापनांचे परवाने निलंबित करण्यात आले आहेत.

कार्तिकी वारीच्या पार्श्वभूमीवर पंढरपूरमधील 54 अन्न व्यावसायिक आस्थापनांची तपासणी करण्यात आली. तसेच ठाणे, रायगड आणि पुणे परिसरात चहा मिक्स, तूप आणि जेलीपॉप असा एकूण 68,094 रुपये किमतीचा साठा जप्त करण्यात आला.
मुंबईत अन्न सुरक्षा आणि स्वच्छतेच्या नियमांचे उल्लंघन केल्याप्रकरणी 6 आस्थापनांचे परवाने तातडीने निलंबित करण्यात आले.
दरम्यान, प्रतिबंधित गुटखा आणि पान मसाल्याविरोधातील मोहिमेत 16.42 लाख रुपयांहून अधिक किमतीचा साठा जप्त करण्यात आला आहे. या प्रकरणांत 4 गुन्हे दाखल करून 7 जणांना अटक करण्यात आली आहे. त्यामुळे अन्नपदार्थांच्या विक्रीत नियम मोडणाऱ्या व्यावसायिकांमध्ये प्रशासनाच्या कारवाईमुळे खळबळ उडाली आहे.







