लोणी काळभोर : लोणी काळभोर (ता. हवेली) येथील भाजीमंडईसमोर रस्ता ओलांडणाऱ्या 82 वर्षीय वृद्ध महिलेला भरधाव दुचाकीने जोरदार धडक दिल्याची घटना गुरुवारी (ता. 19 ) दुपारी अडीच वाजण्याच्या सुमारास घडली आहे . या अपघातात वृद्ध महिला गंभीर जखमी झाल्या असून, त्यांच्या उजव्या पायाच्या नडगीला व गुडघ्याला तसेच बरगडीला दुखापत झाली आहे. त्यांना फ्रॅक्चर झाले असून, विश्वराज रुग्णालयात उपचारासाठी दाखल करण्यात आले आहे.

गयुबाई बाबुराव कांबळे (वय 82 , रा. बौद्धवस्ती, लोणी काळभोर) असे जखमी झालेल्या महिलेचे नाव आहे. याप्रकरणी स्नेहल हरीश्चंद्र कांबळे (वय 30) यांनी लोणी काळभोर पोलिस ठाण्यात फिर्याद दिली आहे. त्यानुसार अल्पवयीन मुलाच्या विरोधात मोटरवाहन अधिनियम, 1988 – 119,134,177,184 ; भारतीय न्याय संहिता (बी एन एस), 2023 – 125(b),281 प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, गयुबाई कांबळे या लोणी काळभोर भाजीमंडईमध्ये भाजीपाला विक्रीचा व्यवसाय करतात. गुरुवारी सकाळी नेहमीप्रमाणे त्या भाजी विक्रीसाठी मंडईत गेल्या होत्या. दुपारी अडीच वाजण्याच्या सुमारास लघुशंकेसाठी जाण्याकरिता त्या भाजीमंडईसमोरील लोणी फाटा ते लोणी गावाकडे जाणारा रस्ता ओलांडत होत्या. त्यावेळी लोणी गावाच्या बाजूने आलेल्या भरधाव दुचाकीने त्यांना जोरदार धडक दिली. या धडकेत त्या रस्त्यावर पडून गंभीर जखमी झाल्या.

अपघाताची माहिती मिळताच त्यांच्या नातवंडांनी घटनास्थळी धाव घेत खासगी रुग्णवाहिकेतून त्यांना विश्वराज रुग्णालयात दाखल केले. दरम्यान, दुचाकीस्वाराच्या नातेवाइकांनी रुग्णालयात येऊन उपचाराचा खर्च करण्याची तयारी दर्शवित तक्रार न देण्याची विनंती केल्याचे फिर्यादीत नमूद आहे. संबंधित दुचाकीचा क्रमांक एमएच 12 आरएच 4326 असून, ती दुचाकी 16 वर्षीय अल्पवयीन मुलगा चालवत असल्याचे सांगण्यात आले.
दरम्यान, या अपघातानंतर जखमी महिलेला मदत न करता दुचाकीस्वार घटनास्थळावरून निघून गेल्याचा आरोप फिर्यादीने केला आहे. याप्रकरणी स्नेहल कांबळे यांनी लोणी काळभोर पोलीस ठाण्यात तक्रार दिली असून, पोलिसांकडून पुढील कायदेशीर कारवाई केली जात आहे.






