सागर जगदाळे

भिगवण: इंदापूर तालुक्यातील लामजेवाडी येथे अज्ञात चोरट्यांनी भरदिवसा घरफोडी करून सोन्या-चांदीचे दागिने आणि रोख रक्कम असा सुमारे १ लाख ९३ हजार रुपयांचा ऐवज चोरून नेल्याची घटना उघडकीस आली आहे. या घटनेमुळे परिसरात खळबळ उडाली असून नागरिकांमध्ये चिंतेचे वातावरण निर्माण झाले आहे.
मिळालेल्या माहितीनुसार, लामजेवाडी (ता. इंदापूर) येथील रहिवासी नवनाथ अशोक निगडे (वय ४१, व्यवसाय बांधकाम) यांच्या घरी गुरुवार (दि. १९ नोव्हेंबर) रोजी दुपारी ३ ते ४ वाजण्याच्या दरम्यान ही चोरी झाली. अज्ञात चोरट्यांनी घराच्या दरवाजाची कडी कशाच्या तरी साहाय्याने उचकटून घरात प्रवेश केला. त्यानंतर घरातील लोखंडी कपाटाचे लॉक तोडून त्यामधील सोन्या-चांदीचे दागिने आणि रोख रक्कम चोरून नेली.

चोरीस गेलेल्या ऐवजात अंदाजे ३० ग्रॅम वजनाचे सोन्याचे मोठे मंगळसूत्र (किंमत १ लाख रुपये), १७ ग्रॅम वजनाचे सोन्याचे मिनी मंगळसूत्र (किंमत ५० हजार रुपये), ७ ग्रॅम वजनाचे सोन्याचे झुमके (किंमत २५ हजार रुपये), चांदीचे पैंजण (किंमत ८ हजार रुपये) तसेच १० हजार रुपये रोख रकमेचा समावेश आहे. असा एकूण सुमारे १ लाख ९३ हजार रुपयांचा मुद्देमाल चोरीला गेला आहे. या घटनेप्रकरणी नवनाथ अशोक निगडे यांनी भिगवण पोलीस ठाण्यात तक्रार दाखल केली असून अज्ञात चोरट्यांविरोधात गुन्हा नोंदविण्यात आला आहे.
भरदिवसा घरफोडी करून चोरट्यांनी घरातील दागिने आणि रोकड लंपास केल्याने लामजेवाडी परिसरात भीतीचे वातावरण निर्माण झाले आहे. या चोरीचा तपास भिगवण पोलीस करीत असून अज्ञात चोरट्यांचा शोध घेण्याचे आव्हान पोलिसांसमोर आहे.






