पुणे : स्वारगेट ते कात्रज भूमिगत मेट्रो मार्गाच्या कामाला वेग देण्यासाठी कात्रज परिसरातील वाहतुकीत महत्त्वाचे बदल करण्यात आले आहेत. मेट्रोच्या कामामुळे कात्रज मुख्य चौकातून जाणाऱ्या अवजड वाहनांची वाहतूक यापूर्वीच वळवण्यात आली आहे. आता वाहतूक कोंडी टाळण्यासाठी कात्रज डेअरी चौकातील मार्गरचनेतही बदल करण्यात आला आहे. हे नवीन नियम 19 नोव्हेंबर 2026 पासून लागू झाले असून, पुढील आदेश मिळेपर्यंत कायम राहणार आहेत.

या बदलांनुसार स्वारगेटहून कात्रज चौकाच्या दिशेने जाणाऱ्या वाहनांना कात्रज डेअरी चौकात उजवीकडे वळता येणार नाही. त्यामुळे वाहनचालकांनी पर्यायी मार्गाचा वापर करणे आवश्यक आहे.
कुठून आणि कुठे घ्यावा यू-टर्न?

स्वारगेटकडून बालाजीनगरकडे जाणाऱ्या वाहनचालकांनी कात्रज डेअरी चौकाच्या सुमारे 250 मीटर आधी यू-टर्न घ्यावा. तर सरहद चौकाच्या दिशेने जाणाऱ्या वाहनांनी चौक ओलांडल्यानंतर 250 मीटर पुढे यू-टर्न घेऊन पुढील प्रवास करावा.
दुसरीकडे, सरहद चौकाकडून कात्रज चौकाकडे जाणाऱ्या वाहनांसाठीही मार्गात बदल करण्यात आला आहे. अशा वाहनचालकांनी कात्रज डेअरी चौकात पोहोचल्यानंतर डावीकडे स्वारगेटच्या दिशेने वळावे. त्यानंतर सुमारे 100 मीटर अंतरावर यू-टर्न घेऊन आपल्या इच्छित ठिकाणी जाता येईल.
वाहतूक पोलिसांचे आवाहन
मेट्रोच्या कामादरम्यान वाहनांची गर्दी होऊ नये आणि प्रवास सुरक्षित राहावा, यासाठी हे बदल लागू करण्यात आले आहेत. वाहनचालकांनी नवीन वाहतूक नियमांची माहिती घेऊनच प्रवास करावा. तसेच वाहतूक पोलिसांच्या सूचनांचे पालन करून पर्यायी मार्गांचा वापर करावा, असे आवाहन पुणे शहर वाहतूक शाखेचे पोलीस उपायुक्त डॉ. संदीप भाजीभाकरे यांनी केले आहे.






