पुणे : उपमुख्यमंत्री एकनाथ शिंदे यांच्या शिवसेनेन पुणे शहर आणि ग्रामीण भागात आपली ताकद पुन्हा वाढवण्यासाठी जोरदार कंबर कसली आहे. गेल्या महापालिका निवडणुकीतील अपयश मागे टाकून आणि आगामी निवडणुका डोळ्यासमोर ठेवून पक्षाच्या रचनेत मोठे बदल केले जाणार आहेत. येत्या 8 ते 10 दिवसांत या नव्या बदलांची अधिकृत घोषणा होण्याची शक्यता आहे.

पक्षाची सद्यस्थिती जाणून घेण्यासाठी ज्येष्ठ नेते उदय सामंत आणि सचिन अहिर यांनी नुकताच पुणे दौरा केला. या दौऱ्यात त्यांनी शहरातील प्रमुख नेते, पदाधिकारी आणि तळागाळातील कार्यकर्त्यांशी थेट संवाद साधला. या बैठकीत जुन्या पदाधिकाऱ्यांच्या कामाचा सविस्तर हिशोब तपासण्यात आला. सर्व कार्यकर्त्यांची मते आणि सूचना ऐकून घेतल्यानंतरच नव्या निवडींवर शिक्कामोर्तब केले जाईल, असे सचिन अहिर यांनी स्पष्ट केले आहे.
केवळ पदे मिरवणाऱ्या आणि प्रत्यक्ष मैदानात काम न करणाऱ्या पदाधिकाऱ्यांना आता बाहेरचा रस्ता दाखवला जाणार आहे. गेल्या काही काळापासून पुण्यात पक्षाची कार्यकारिणी स्थगित असल्याने कामकाज काहीसे थंडावले होते. त्यामुळे आता फक्त काम करणाऱ्या आणि पक्षवाढीसाठी वेळ देणाऱ्या निष्ठावान कार्यकर्त्यांनाच जबाबदारी दिली जाईल. नव्या चेहऱ्यांना संधी देऊन पक्षात नवचैतन्य निर्माण करण्याचा वरिष्ठ नेत्यांचा प्रयत्न आहे.

पुणे शहर आणि संपूर्ण जिल्ह्यात पक्षाचा जनाधार वाढवणे हेच मुख्य उद्दिष्ट आहे. मागील निवडणुकीत झालेल्या चुका सुधारून बूथ पातळीवर संघटना मजबूत केली जाणार आहे. विशेष म्हणजे, हा पक्षविस्तार करत असताना महायुतीमधील मित्रपक्षांशी कोणताही वाद किंवा संघर्ष होणार नाही, याची पूर्ण काळजी घेतली जाईल. मित्रपक्षांशी समन्वय ठेवूनच शिवसेना पुण्यात आपले स्वतंत्र स्थान पुन्हा निर्माण करणार आहे.







