थेऊर : जुन्या संशयाच्या कारणावरून तडीपार आरोपीने साथीदारासह तरुणाचा पाठलाग करत त्याच्या कारवर कोयत्याने हल्ला केल्याची घटना घडली. कोलवडी-मांजरी रोडवरील चिंतामणी आंगण सोसायटी परिसरात बुधवारी (ता. 18) सकाळी सुमारे पाऊणे अकरा वाजण्याच्या सुमारास ही घटना घडली.

सागर राजेंद्र भालसिंग (वय 32, रा. भालसिंग वस्ती, कोलवडी) आणि साहील तांबोळी (रा. कोलवडी) अशी आरोपींची नावे आहेत. यावेळी आरोपीने कारच्या पुढील व मागील काचा फोडून अंदाजे 30 हजार रुपयांचे नुकसान केले. जीव वाचवण्यासाठी तरुणाने थेट मांजरी पोलीस ठाण्यात धाव घेतली. महेश बाळासो भालसिंग (वय -26, रा. भालसिंग वस्ती, कोलवडी, ता. हवेली) यांनी याप्रकरणी लोणीकंद पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, महेश भालसिंग हे खराडी येथील ईऑन आयटी पार्कमध्ये नोकरी करतात. दोन वर्षांपूर्वी सागर भालसिंग याने संशयावरून महेश यांना मारहाण व शिवीगाळ करून धमकी दिली होती. त्यावेळी पोलिसांनी सागरला समज दिली होती. मात्र, त्यानंतरही तो अधूनमधून धमकावत असल्याचे फिर्यादीत नमूद आहे. सागर याच्याविरुद्ध यापूर्वी पत्नीला मारहाण केल्याप्रकरणीही गुन्हा दाखल असून, त्याच्यावर तडीपारीची कारवाई करण्यात आली आहे.

बुधवारी सकाळी (एमएच 12 जेझेड 1896) कार घेऊन मांजरीमार्गे खराडीकडे जात होते. चिंतामणी आंगण सोसायटी परिसरात सागर भालसिंग हा साहील तांबोळी याच्यासह मोपेडवरून त्यांच्या कारच्या मागे आला. दोघांनी शिवीगाळ सुरू केली. सागरच्या हातात कोयता असल्याचे महेश यांच्या निदर्शनास आले.
‘थांब, आज तुला जिवंत सोडत नाही,’ अशी धमकी देत आरोपींनी मोपेड कारसमोर आडवी लावली. घाबरलेल्या महेश यांनी कार रस्त्याच्या खाली उतरवून पुढे नेली. आरोपींनी वेगाने पाठलाग करत कारच्या उजव्या बाजूला येऊन सागरने हातातील कोयत्याने कारची पुढील काच फोडली. हल्ल्याच्या भीतीने महेश यांनी कार न थांबवता वेगाने मांजरी पोलीस ठाण्याच्या दिशेने धाव घेतली.
दरम्यान, मांजरी पोलीस ठाण्याजवळ कार उभी करून महेश जीव वाचवण्यासाठी पोलीस ठाण्यात गेले. त्यानंतर सागरने कारवर दगड मारून मागील काच फोडली आणि साहीलच्या मोपेडवरून घटनास्थळावरून पळ काढला. या हल्ल्यात कारच्या दोन्ही काचा फुटल्याने सुमारे 30 हजार रुपयांचे नुकसान झाल्याचे फिर्यादीत म्हटले आहे. तपास लोणीकंद पोलीस करीत आहेत.






