पुणे : पुण्यात शेअर बाजारातील गुंतवणुकीच्या नावाखाली तब्बल 17 लोकांची 5 कोटी 93 लाख रुपयांची फसवणूक झाल्याची घटना उघडकीस आली आहे. या प्रकरणात चतुःशृंगी पोलीस ठाण्यात गुन्हा नोंदवण्यात आला असून पोलीस पुढील चौकशी करत आहेत.

सुरुवातीला गुंतवणूकदारांचा विश्वास बसवण्यासाठी आरोपींनी 3 कोटी 50 लाख रुपयांचा परतावा दिला. लोक सहज भुलतील असा मोठा नफा एका वर्षात मिळेल आणि मूळ रक्कमही सुरक्षित राहील, असे खोटे आश्वासन देण्यात आले. एकदा का लोकांचा विश्वास पक्का झाला, की आरोपींनी मूळ गुंतवणुकीची मोठी रक्कम स्वतःकडे ठेवून घेतली आणि फसवणूक केली.
गोखलेनगर भागातील 52 वर्षांच्या एका जिम चालकाने याबाबत पोलिसांत तक्रार केली आहे. विशेष म्हणजे तक्रारदार आणि मुख्य आरोपी जोडपे हे जवळचे नातेवाईक आहेत. जानेवारी 2022 पासून जुलै 2025 दरम्यान हा सर्व प्रकार घडल्याचे प्राथमिक तपासात समोर आले आहे. आरोपी अक्षय भिसे आणि त्याच्या साथीदारांनी थेट तक्रारदाराच्या घरी जाऊन गुंतवणुकीसाठी गळ घातली होती आणि त्यातूनच इतरांनाही पैसे लावण्यास प्रवृत्त केले.

या गुन्ह्यामध्ये अक्षय दीपक भिसे, त्याची पत्नी श्वेता अक्षय भिसे, मेहुणा अनिकेत खोज आणि किरण गजमल या चौघांवर चतुःशृंगी पोलीस ठाण्यात गुन्हा दाखल करण्यात आला आहे. या चारही जणांनी संगनमत करून गुंतवणूकदारांची आर्थिक फसवणूक केल्याचे स्पष्ट झाले आहे.
अशा प्रकारे चांगल्या मोबदल्याचे स्वप्न दाखवून सामान्य गुंतवणूकदारांची कोट्यवधी रुपयांची रक्कम हडपण्याचा प्रकार पुण्यात घडला आहे. शेअर बाजारात गुंतवणूक करताना कोणाच्याही तोंडी आश्वासनांवर लगेच विश्वास ठेवू नये, असा धडा या घटनेतून मिळतो. सध्या पोलीस या चौघांची भूमिका आणि पैशांचा व्यवहार कसा झाला, याचा अधिक तपास करत आहेत.







