मुंबई: कर्तव्यावर असताना सोशल मीडियासाठी रील तयार करणे पनवेल एसटी आगारातील तीन कर्मचाऱ्यांना चांगलेच महागात पडले आहे. एसटी महामंडळाच्या नियमांचे उल्लंघन करून अधिकृत गणवेशात व्हिडिओ तयार करून तो सोशल मीडियावर प्रसिद्ध केल्याप्रकरणी परिवहन विभागाने तिघांवर निलंबनाची कारवाई केली आहे.
मिळालेल्या माहितीनुसार, पनवेल एसटी आगारातील महिला वाहतूक वाहक नंदा कोळी यांनी एसटी महामंडळाच्या गणवेशात रील तयार केला होता. या व्हिडिओमध्ये वाहतूक नियंत्रक विजय माने आणि सुनील देशमुख हे देखील सहभागी होते. हा व्हिडिओ सोशल मीडियावर व्हायरल झाल्यानंतर हा प्रकार परिवहन विभागाच्या निदर्शनास आला.
एसटी महामंडळाच्या नियमांनुसार, सेवेत किंवा कर्तव्यावर असताना कर्मचाऱ्यांना रील्स तयार करणे, व्हिडिओ शूट करणे किंवा लाईव्ह स्ट्रीमिंग करण्यास परवानगी नाही. असे असतानाही संबंधित कर्मचाऱ्यांनी नियमांचे उल्लंघन केल्याचे आढळून आले.
व्हिडिओची सत्यता पडताळल्यानंतर परिवहन विभागाने तिन्ही कर्मचाऱ्यांना कारणे दाखवा नोटीस बजावली. त्यानंतर शिस्तभंगाची कारवाई करत तिघांनाही निलंबित करण्यात आले. कर्तव्यावर असताना नियमांचे उल्लंघन करणाऱ्या कोणत्याही कर्मचाऱ्याची गय केली जाणार नाही, असा स्पष्ट संदेश या कारवाईतून देण्यात आला आहे.
View this post on Instagram
दरम्यान, राज्य सरकारने एसटी महामंडळाच्या कर्मचाऱ्यांसाठी नवी आचारसंहिता लागू केली आहे. त्यानुसार एसटीची प्रतिमा मलिन होईल, असे व्हिडिओ किंवा इतर मजकूर सोशल मीडियावर प्रसारित केल्यास संबंधित कर्मचाऱ्यांवर कारवाई केली जाणार आहे.
नव्या नियमांनुसार चालक, वाहक आणि इतर कर्मचाऱ्यांना कर्तव्यावर असताना रील्स, व्हिडिओ किंवा लाईव्ह स्ट्रीमिंग करण्यास बंदी घालण्यात आली आहे. तसेच वाहन चालवताना व्हिडिओ तयार करणे, आगार, बसस्थानक, कार्यालय किंवा एसटी बसमध्ये गणवेशात सोशल मीडियासाठी चित्रीकरण करणेही नियमबाह्य ठरणार असल्याचे महामंडळाने स्पष्ट केले आहे.
