पुणे, ता. ७ : विश्रांतवाडी पोलिसांनी वाहनचोरीविरोधात प्रभावी कारवाई करत एका सराईत वाहनचोराला अटक केली असून त्याच्याकडून तब्बल ४ लाख ८० हजार रुपये किमतीच्या सहा चोरीच्या मोटारसायकली जप्त करण्यात आल्या आहेत.
ओमकार रामभवन यादव (वय २०, रा. शांतिनगर, येरवडा, पुणे) असे अटक करण्यात आलेल्या आरोपीचे नाव आहे. विश्रांतवाडी पोलीस ठाण्यात दाखल असलेल्या वाहनचोरीच्या गुन्ह्याचा तपास सुरू असताना तपास पथकातील पोलीस हवालदार वामन सावंत आणि संजय बादरे यांना मिळालेल्या गोपनीय माहितीच्या आधारे पोलिसांनी ओमकार यादव याला ताब्यात घेतले. त्याची सखोल चौकशी केली असता त्याने चोरी करून लपवून ठेवलेल्या सहा मोटारसायकली पोलिसांनी जप्त केल्या.
जप्त करण्यात आलेल्या वाहनांमध्ये केटीएम ड्युक, यामाहा आर-१५, यामाहा आरएक्स-१०० (२), होंडा स्प्लेंडर प्लस आणि पॅशन प्लस या मोटारसायकलींचा समावेश असून, त्यांची एकूण किंमत ४ लाख ८० हजार रुपये असल्याचे पोलिसांनी सांगितले.
ही कारवाई अपर पोलीस आयुक्त मनोज पाटील, पोलीस उपायुक्त रजनिकांत चिलुमुला, सहाय्यक पोलीस आयुक्त सुनील जैतापूरकर, वरिष्ठ पोलीस निरीक्षक राजेंद्र पन्हाळे, पोलीस निरीक्षक (गुन्हे) संपतराव राऊन आणि पोलीस निरीक्षक अमर कदम यांच्या मार्गदर्शनाखाली करण्यात आली.
या कारवाईत सहाय्यक पोलीस निरीक्षक सुनील उगले यांच्यासह पोलीस अंमलदार बबन वणवे, यशवंत किर्वे, कृष्णा माचरे, संजय बादरे, वामन सावंत, संपत भोसले, विशाल गाडे, धवल लोणकर, स्वप्नील कांबळे, किशोर भुसारे, प्रमोद जाधव आणि होना साबळे यांनी उल्लेखनीय कामगिरी बजावली.
