बारामती, ता. 23 : बारामतीच्या राजकारणात पुन्हा एकदा मोठी राजकीय चुरस पाहायला मिळण्याची शक्यता व्यक्त होत आहे. 2029 च्या विधानसभा निवडणुकीत ‘पवार विरुद्ध पवार’ अशी थेट लढत रंगू शकते, असा अंदाज रोहित पवार यांनी व्यक्त केला. बारामतीत मतदानाचा हक्क बजावल्यानंतर माध्यमांशी संवाद साधताना त्यांनी हे विधान केले.
जय पवार यांनी 2029 मध्ये बारामतीतून निवडणूक लढवण्याची इच्छा व्यक्त केल्याच्या पार्श्वभूमीवर प्रतिक्रिया देताना रोहित पवार म्हणाले की, उमेदवारीचा अंतिम निर्णय हा पक्ष आणि कार्यकर्त्यांच्या इच्छेनुसारच घेतला जाईल. जर सुनेत्रा पवार निवडणूक लढवणार नसतील, तर त्यांच्या पक्षाकडून दुसरा उमेदवार रिंगणात उतरण्याची शक्यता आहे.
“आमचे आणि त्यांचे पक्ष वेगळे असल्यामुळे भविष्यात ‘पवार विरुद्ध पवार’ अशी लढत होण्याची शक्यता नाकारता येत नाही,” असे स्पष्ट करत रोहित पवार यांनी यापूर्वीच्या लोकसभा निवडणुकीतही अशी परिस्थिती निर्माण झाल्याची आठवण करून दिली.
यावेळी त्यांनी भावनिक आणि राजकीय वास्तव यातील फरकही अधोरेखित केला. “भावनिक दृष्टीकोनातून आम्ही सुनेत्रा पवार यांच्या प्रचारात सहभागी झालो होतो, मात्र राजकारणात निर्णय घेताना वास्तव वेगळे असते,” असे ते म्हणाले. पवार कुटुंब एकत्र यावे, अशी जनतेची अपेक्षा असली तरी राजकारणात अनेकदा कठोर निर्णय घ्यावे लागतात, असेही त्यांनी स्पष्ट केले.
दरम्यान, जय अजित पवार यांनीही बारामतीतील जनतेच्या अपेक्षांचा उल्लेख करत 2029 मध्ये उमेदवारीची इच्छा व्यक्त केली आहे. त्यामुळे येत्या काळात बारामतीतील राजकीय समीकरणे बदलण्याची शक्यता असून, पवार कुटुंबातील संभाव्य थेट लढतीकडे संपूर्ण राज्याचे लक्ष लागले आहे.
