पश्चिम बंगाल : पश्चिम बंगालमध्ये विधानसभा निवडणुकीच्या पहिल्या टप्प्यात मतदानादरम्यान अनेक ठिकाणी तणावपूर्ण परिस्थिती निर्माण झाली असून काही भागांत हिंसाचाराच्या घटना घडल्याच्या बातम्या समोर आल्या आहेत.
मुर्शिदाबाद, कूचबिहार, सिलिगुडी आणि मालदा येथे मारामारी, तोडफोड आणि जाळपोळ झाल्याचे वृत्त आहे. मुर्शिदाबादमध्ये AJUPचे प्रमुख आणि रेजीनगरचे उमेदवार हुमायू कबीर यांच्या गाडीवर अज्ञात व्यक्तींनी हल्ला केल्याचा आरोप आहे. या घटनेनंतर परिसरात गोंधळ उडाला आणि विविध पक्षांच्या कार्यकर्त्यांमध्ये वाद वाढला. कबीर यांनी या प्रकरणाची उच्चस्तरीय चौकशी करण्याची मागणी केली आहे.
कूचबिहारच्या तुफानगंज भागात मतदानावेळी मोठी गर्दी झाल्यामुळे परिस्थिती तणावपूर्ण बनली. गर्दी पांगवण्यासाठी केंद्रीय दलांनी लाठीचार्ज केल्याची माहिती मिळते. काही ठिकाणी मतदारांना धमकावण्याचा प्रयत्न झाल्याचेही आरोप करण्यात आले आहेत.
बुधवारी रात्री उशिरा मतदान सुरू होण्यापूर्वी मुर्शिदाबादच्या नौदा येथे एक कच्चे बॉम्ब फेकण्यात आले. यात अनेक जण जखमी झाले. यानंतर, आम जनता उन्नयन पार्टीचे (एजेयूपी) प्रमुख हुमायून कबीर सकाळी घटनास्थळी पोहोचले, तेव्हा त्यांना विरोधाचा सामना करावा लागला. त्यांचा टीएमसी कार्यकर्त्यांशी संघर्षही झाला आणि त्यानंतर त्यांनी धरणे आंदोलन केले. त्यांनी सांगितले की, पोलीस टीएमसी कार्यकर्त्यांविरुद्ध गुंडगिरी करत आहेत आणि त्यांच्या समर्थकांना मारहाण केली जात आहे.
दरम्यान, दक्षिण दिनाजपूरमधील कुमारगंज मतदारसंघात भाजप उमेदवार सुवेंदू सरकार यांच्यावर हल्ला झाल्याचा आरोप आहे. बूथ जॅमिंगची माहिती मिळाल्यानंतर ते घटनास्थळी गेले असता काही कार्यकर्त्यांनी त्यांच्यावर मारहाण केल्याचे सांगितले जात आहे. या घटनेबाबत अधिकृत पुष्टी आणि चौकशीची प्रतीक्षा आहे.
दरम्यान, राज्यातील उर्वरित 142 जागांसाठी दुसऱ्या टप्प्यात 29 एप्रिल रोजी मतदान होईल आणि 4 मे रोजी निकाल जाहीर केला जाईल. एकूणच मतदान प्रक्रियेदरम्यान काही ठिकाणी तणाव आणि हिंसाचारामुळे वातावरण ढवळून निघाले असून प्रशासनाने परिस्थिती नियंत्रणात आणण्याचा प्रयत्न सुरू ठेवला आहे.
