कोल्हापूर, : कोल्हापूर जिल्ह्यात सावकारीच्या व्यवहारातून उघडकीस आलेल्या एका धक्कादायक प्रकरणाने राज्यात खळबळ उडवली आहे. व्याजाने दिलेल्या पैशांच्या वसुलीच्या नावाखाली एका महिलेवर जबरदस्तीने अत्याचार केल्याचा गंभीर आरोप अमित सावंत या सावकारावर करण्यात आला आहे. या प्रकरणी गांधीनगर पोलिस ठाण्यात गुन्हा दाखल करण्यात आला असून, पोलिसांनी तात्काळ कारवाई करत आरोपीला अटक केली आहे.
मिळालेल्या माहितीनुसार, आरोपी अमित सावंत हा मूळ व्यवसायाने चालक असला तरी तो खाजगी सावकारीचा व्यवसाय करत होता. आर्थिक अडचणीत असलेल्या कोल्हापूरजवळील गडमुडशिंगी गावातील एका महिलेने सुमारे दोन वर्षांपूर्वी त्याच्याकडून मोठी रक्कम व्याजाने घेतली होती. सुरुवातीला काही काळ त्या महिलेने नियमित व्याज फेडले; मात्र नंतर आर्थिक परिस्थिती बिघडल्याने तिला पैसे देणे शक्य झाले नाही.
याच परिस्थितीचा गैरफायदा घेत आरोपीने संबंधित महिलेच्या घरी जाऊन तिच्यावर जबरदस्तीने अत्याचार केल्याचा आरोप आहे. एवढ्यावरच तो थांबला नाही, तर या घटनेचा व्हिडिओ तयार करून तो महिलेवर दबाव आणण्यासाठी वापरल्याचेही तक्रारीत नमूद करण्यात आले आहे. या व्हिडिओच्या आधारे आरोपीने महिलेवर वारंवार अत्याचार केल्याचा आरोप पीडितेने केला आहे.
तसेच, आरोपीच्या मोबाईलमध्ये अशा प्रकारचे 200 ते 300 व्हिडिओ असल्याचा गंभीर दावा पीडित महिलेने केला आहे. या दाव्यामुळे प्रकरण अधिकच गंभीर बनले असून, अनेक महिलांवर अशाच प्रकारे अत्याचार झाल्याची शक्यता व्यक्त केली जात आहे. आरोपीने हे व्हिडिओ इतरांना दाखवल्याचाही आरोप समोर आला असून, त्यामुळे संतापाची लाट उसळली आहे.
या प्रकारामुळे संतप्त झालेल्या पीडित महिलेने अखेर पोलिसांकडे धाव घेतली. तिच्या तक्रारीनंतर गांधीनगर पोलिसांनी तत्काळ गुन्हा दाखल करून आरोपीला अटक केली. याप्रकरणी पोलिस अधिक तपास करत असून, आरोपीचा मोबाईल आणि इतर पुरावे जप्त करण्यात आले आहेत.
दरम्यान, पीडित महिलेने आरोपीसोबतच त्याच्या काही सहकाऱ्यांवरही गंभीर आरोप केले आहेत. आर्थिक अडचणीत सापडलेल्या इतर महिलांनाही अशाच प्रकारे जाळ्यात ओढून त्यांच्यावर अत्याचार करण्यात आल्याचा संशय व्यक्त केला जात आहे. त्यामुळे या प्रकरणाची व्याप्ती आणखी वाढण्याची शक्यता नाकारता येत नाही.
पीडित महिलेने इतर संभाव्य पीडितांनी धाडस करून पुढे यावे आणि तक्रार नोंदवावी, असे आवाहन केले आहे. तसेच आरोपीवर कठोरात कठोर कारवाई करण्यात यावी, अशी मागणीही करण्यात आली आहे. सध्या पोलिस या प्रकरणाचा सर्व बाजूंनी तपास करत असून, पुढील चौकशीत आणखी धक्कादायक माहिती समोर येण्याची शक्यता व्यक्त केली जात आहे.
