पुणे: पुणेकरांसाठी दिलासादायक बातमी असून पुढील 3 ते 4 दिवस शहरात (Weather Report) पावसाची शक्यता हवामान विभागाने वर्तवली आहे. गेल्या काही दिवसांपासून शहरात सकाळपासून कडक ऊन आणि उकाडा जाणवत असला, तरी सायंकाळी ढग दाटून येऊनही पाऊस पडत नव्हता. त्यामुळे नागरिकांची निराशा होत होती. आता मात्र हवामान खात्याने पुण्यासाठी पुढील 4 दिवस ‘यलो अलर्ट’ जारी केला आहे. (Pune Weather)
शनिवारी शहरात कमाल तापमान सुमारे 38 अंश सेल्सिअस, तर किमान तापमान 25.6 अंश सेल्सिअस नोंदवले गेले. दिवसभर उष्णतेचा त्रास जाणवत असताना सायंकाळी ढगाळ वातावरण निर्माण झाले, मात्र पाऊस झाला नाही.
हवामान विभागाच्या अंदाजानुसार, रविवारपासून तापमानात काहीशी घट होण्याची शक्यता आहे. कमाल तापमान 36 अंश सेल्सिअसपर्यंत, तर किमान तापमान 24 अंश सेल्सिअसपर्यंत खाली येऊ शकते. त्यामुळे उकाड्यापासून काहीसा दिलासा मिळण्याची अपेक्षा आहे.
हवामान तज्ज्ञांच्या मते, सकाळच्या वेळी आकाश प्रामुख्याने निरभ्र राहील. मात्र दुपारनंतर ढगांची गर्दी वाढेल आणि विजांच्या कडकडाटासह हलक्या ते मध्यम स्वरूपाच्या पावसाच्या सरी कोसळण्याची शक्यता आहे. त्यामुळे पुढील काही दिवस नागरिकांनी बाहेर पडताना छत्री किंवा रेनकोट सोबत ठेवण्याचा सल्ला देण्यात आला आहे.
