उरुळी कांचन, (पुणे) : उरुळी कांचन पोलीस ठाण्याच्या हद्दीत चोरीचे सत्र सुरूच असून परिसरातून दोन वेगवेगळ्या घटनांमध्ये एक इलेक्ट्रिक स्कूटर आणि एक मोटारसायकल चोरीला गेली आहे. जयमल्हार रोडवरील ओढ्याजवळून चालकाची ई-स्कूटर, तर बी. जी. शिर्के विद्यालयाच्या पार्किंगमधून शिक्षकाची मोटारसायकल चोरट्यांनी लंपास केली. या दोन्ही घटनांमध्ये एकूण एक लाख रुपयांचा मुद्देमाल चोरीला गेला असून, उरुळी कांचन पोलिस ठाण्यात अज्ञात चोरट्यांविरोधात गुन्हे दाखल करण्यात आले आहेत.
पहिल्या घटनेत सोरतापवाडी येथील कडवस्ती रोडवर राहणारे बाळासाहेब लक्ष्मण चौधरी (वय-51) हे शाळेच्या वाहनावर चालक म्हणून काम करतात. दैनंदिन कामासाठी ते टीव्हीएस कंपनीची पांढऱ्या रंगाची इलेक्ट्रिक स्कूटर वापरतात. रविवारी (ता.4) रोजी सायंकाळी साडेपाचच्या सुमारास त्यांनी आपली स्कूटर उरुळी कांचन येथील जयमल्हार रोडवरील ओढ्याजवळ उभी केली आणि बाजारात गेले.
सायंकाळी सव्वासहा वाजता बाजार करून परतल्यानंतर त्यांना पार्किंगच्या ठिकाणी स्कूटर दिसली नाही. त्यांनी परिसरात तसेच उरुळी कांचन, कोरेगाव मूळ आणि सोरतापवाडी येथे शोध घेतला; मात्र स्कूटर मिळून आली नाही. अखेर त्यांनी पोलिसांत धाव घेतली. सुमारे 70 हजार रुपये किमतीची इलेक्ट्रिक स्कूटर चोरीला गेल्याप्रकरणी उरुळी कांचन पोलिस ठाण्यात गुन्हा दाखल करण्यात आला आहे.
दुसऱ्या घटनेत दौंड तालुक्यातील वाळकी येथील रहिवासी स्वप्निल बाळासो भालेराव (वय-39) हे उरुळी कांचन येथील बी. जी. शिर्के विद्यालयात शिक्षक म्हणून कार्यरत आहेत. गुरुवारी (ता. 08) सकाळी दहाच्या सुमारास ते हिरो कंपनीची एचएफ डिलक्स मोटारसायकल घेऊन शाळेत आले. त्यांनी मोटारसायकल शाळेच्या पार्किंगमध्ये उभी केली आणि वर्गावर गेले.
दुपारी दोनच्या सुमारास कामानिमित्त बाहेर जाण्यासाठी ते पार्किंगमध्ये आले असता, त्यांना मोटारसायकल दिसून आली नाही. परिसरात शोध घेऊनही दुचाकी न मिळाल्याने त्यांनी पोलिसांत तक्रार दाखल केली. 30 हजार रुपये किमतीची मोटारसायकल चोरीला गेल्याप्रकरणी अज्ञात चोरट्याविरुद्ध गुन्हा नोंदविण्यात आला आहे.
दरम्यान, दोन्ही घटनांमध्ये उरुळी कांचन पोलिस ठाण्यात भारतीय न्याय संहितेच्या कलम 303 (2)अन्वये गुन्हे दाखल करण्यात आले आहेत. उरुळी कांचन पोलिसांकडून या दोन्ही चोरीच्या घटनांचा पुढील तपास सुरू आहे.
