पुणे : दारूच्या नशेत पाळीव पामेरियन कुत्र्याला मारहाण करून चौथ्या मजल्यावरून खाली पत्र्यावर फेकल्याचा धक्कादायक प्रकार रविवार पेठेतील राजधानी प्लाझा इमारतीत घडला. या घटनेत कुत्र्याचा पाय आणि पाठीचा मणका मोडला असून, त्याच्यावर रुग्णालयात उपचार सुरू आहेत. या प्रकरणी खडक पोलिसांनी संबंधित रिक्षाचालकाविरुद्ध गुन्हा दाखल केला आहे.
गणेश लक्ष्मण परदेशी (वय ५२, रा. राजधानी प्लाझा, रविवार पेठ) असे आरोपीचे नाव आहे. सामाजिक कार्यकर्त्या आणि मिशन पॉसिबल फाऊंडेशनच्या संस्थापिका पद्मिनी पिटर स्टंम्प (वय ६८, रा. भवानी पेठ, शंकरशेठ रोड) यांनी याबाबत खडक पोलीस ठाण्यात फिर्याद दिली आहे. ९ ऑक्टोबर रोजी रात्री आठच्या सुमारास ही घटना घडल्याचे तक्रारीत नमूद करण्यात आले आहे.
पोलिसांनी दिलेल्या माहितीनुसार, ९ ऑक्टोबर रोजी रात्री पावणे नऊच्या सुमारास यश शेजवळ हा जखमी अवस्थेतील पामेरियन कुत्र्याला घेऊन मिशन पॉसिबल फाऊंडेशनमध्ये आला. तेथे कुत्र्यावर प्राथमिक उपचार करण्यात आले. त्याला नेमकी कोणती दुखापत झाली, याबाबत विचारणा केली असता, कुत्र्याचा मालक गणेश परदेशी याने त्याला इमारतीच्या चौथ्या मजल्यावरून खाली पत्र्यावर फेकल्याचे यशने सांगितले.
कुत्र्याला पुढील उपचारांसाठी रुग्णालयात दाखल करण्यात आले. डॉक्टरांच्या तपासणीत त्याचा पाय आणि पाठीचा मणका मोडल्याचे समोर आले. आरोपी दारूच्या नशेत कुत्र्याला हाताने आणि बेल्टने मारहाण करत असल्याचा, तसेच त्याला भिंतीवर आपटत असल्याचा आरोपही फिर्यादीत करण्यात आला आहे. कुत्र्याला इमारतीच्या चौथ्या मजल्यावरून फेकल्याचे काही जणांनी पाहिल्याचा दावाही करण्यात आला आहे.
पाळीव प्राण्याला मारहाण करून क्रूर वागणूक दिल्याच्या आरोपावरून खडक पोलिसांनी गणेश परदेशी याच्याविरुद्ध गुन्हा दाखल केला आहे. या प्रकरणाचा पुढील तपास पोलीस उपनिरीक्षक ढोणे करीत आहेत.
