पुणे : पुण्याच्या जुन्नर तालुक्यात घरफोड्या करणाऱ्या एका सराईत आंतरजिल्हा टोळीचा स्थानिक गुन्हे शाखा आणि ओतूर पोलिसांनी पर्दाफाश केला आहे. या कारवाईत पोलिसांनी 3 आरोपींसह चोरीचे सोने विकत घेणाऱ्या एका व्यापाऱ्यालाही बेड्या ठोकल्या आहेत. पोलिसांनी या कारवाईदरम्यान सुमारे 38 लाख 50 हजार रुपयांचा ऐवज जप्त केला आहे.
नारायणगाव आणि ओतूर भागात झालेल्या चार वेगवेगळ्या घरफोड्यांनी खळबळ उडवली होती. विशेष म्हणजे, पोलिसांच्या जाळ्यात अडकण्यापासून वाचण्यासाठी हे चोेर मोबाईलऐवजी थेट वॉकी-टॉकीचा वापर करून एकमेकांशी संपर्क साधत असत. यामुळे पोलिसांसमोर गुन्हेगारांचा माग काढण्याचे मोठे आव्हान निर्माण झाले होते. मात्र, पोलिसांच्या तांत्रिक तपास आणि सीसीटीव्हीच्या धाडसी मोहिमेमुळे हा संपूर्ण प्रकार उजेडात आला.
तपासादरम्यान पोलिसांनी ओतूर ते नाशिक या मार्गावरील तब्बल 150 हून अधिक सीसीटीव्ही कॅमेऱ्यांची फुटेज तपासली. यामध्ये एक संशयास्पद कार आढळून आली, जी सोनू शेख याच्या नावावर असल्याचे समोर आले. यानंतर पोलिसांनी सापळा रचून नाशिकच्या वडाळा भागातून मुख्य संशयिताला ताब्यात घेतले.
या प्रकरणात वसीम मुनीर पठाण, अदनान युनूस पठाण आणि सोनू उर्फ महंमद शरीफ रसूल शेख (सर्वजण पिंपळगाव नजीक, लासलगाव, तालुका निफाड) या ३ जणांना अटक करण्यात आली आहे. तसेच, त्यांच्याकडून सोन्याचे दागिने खरेदी करणारा सागर अशोक शिंदे नावाचा व्यापारीही पोलिसांच्या जाळ्यात अडकला आहे.
स्थानिक गुन्हे शाखेचे पोलीस निरीक्षक प्रमोद क्षीरसागर आणि सहाय्यक पोलीस निरीक्षक महादेव शेलार यांनी या धडक कारवाईची माहिती दिली आहे. पोलिसांच्या या सतर्कतेमुळे परिसरातील मोठा घरफोडीचा कट उधळला गेला आहे.
