नाशिक : नाशिक जिल्ह्यातील चांदवड तालुक्यात अल्पवयीन मुलीवरील लैंगिक अत्याचाराचे गंभीर प्रकरण समोर आले आहे. पीडित मुलगी अवघ्या १४ वर्षे १६ दिवसांची असून, तिच्या चुलत भावाने लग्नाचे आमिष दाखवून तिच्यावर वारंवार अत्याचार केल्याचा आरोप आहे. या घटनेनंतर मुलगी गर्भवती राहिली आणि तिने एका नवजात बालिकेला जन्म दिला.
मिळालेल्या माहितीनुसार, चांदवड तालुक्यातील एका गावातील पोलीस ठाण्याच्या हद्दीत ही घटना घडली. आरोपीने पीडित मुलीला लग्नाचे आमिष दाखवून तिच्याशी जवळीक साधली. त्यानंतर ९ जानेवारी २०२६ ते २७ सप्टेंबर २०२६ या कालावधीत तिच्या राहत्या घरी वारंवार लैंगिक अत्याचार केल्याचा आरोप आहे. या प्रकारामुळे पीडित मुलगी गर्भवती राहिली. अखेर तिने एका बालिकेला जन्म दिला.
या प्रकरणी संबंधित पोलीस ठाण्यात गुन्हा दाखल करण्यात आला आहे. भारतीय न्याय संहिता २०२३ मधील कलम ६४(२) आणि ६५(१), तसेच बालकांचे लैंगिक अत्याचारापासून संरक्षण कायदा अर्थात पॉक्सो कायद्यातील कलम ४, ६, ८ आणि १२ अन्वये कारवाई करण्यात आली आहे.
पोलीस उपनिरीक्षक अमोल बी. पवार या प्रकरणाचा पुढील तपास करत आहेत. अल्पवयीन मुलीच्या सुरक्षिततेचा आणि तिच्या वैद्यकीय व मानसिक आधाराचा प्रश्नही या घटनेमुळे ऐरणीवर आला आहे. तपासातून या प्रकरणातील अधिक माहिती समोर येण्याची शक्यता आहे.
