आदित्य बोराटे
बारामती : बारामती तालुका पोलीस ठाण्याच्या हद्दीत झालेल्या घरफोडीच्या गुन्ह्याचा छडा लावण्यात स्थानिक गुन्हे शाखेला यश आले आहे. या प्रकरणात जयपाल लखन पवार (वय ४१, रा. निरावाघज फाटा, निरावाघज, ता. बारामती, जि. पुणे) या महिलेला बारामती एसटी बसस्थानक परिसरातून ताब्यात घेण्यात आले. तिच्याकडून चोरीस गेलेले चार तोळे वजनाचे, ५ लाख ४ हजार रुपये किमतीचे सोन्याचे दागिने जप्त करण्यात आले आहेत.
पोलिसांनी दिलेल्या माहितीनुसार,बारामती तालुका पोलीस ठाण्यात गुन्हा रजिस्टर क्रमांक ४८१/२०२६ अन्वये भारतीय न्याय संहितेच्या कलम ३०५(ब) आणि ३३१(३) नुसार घरफोडीचा गुन्हा दाखल आहे. या गुन्ह्याचा समांतर तपास करून तो उघडकीस आणण्याच्या सूचना स्थानिक गुन्हे शाखेचे पोलीस निरीक्षक प्रमोद क्षिरसागर यांनी दिल्या होत्या.
त्यानुसार ६ ऑक्टोबर २०२६ रोजी स्थानिक गुन्हे शाखेच्या पथकाने घटनास्थळी भेट देऊन माहिती घेत तपास सुरू केला. तपासादरम्यान गोपनीय बातमीदाराकडून मिळालेल्या माहितीनुसार, या गुन्ह्यात संबंधित महिलेचा सहभाग असल्याचे समोर आले. ती बारामती बसस्थानक परिसरातून साताऱ्याला जाण्याच्या तयारीत असल्याची माहिती पोलिसांना मिळाली.
या माहितीच्या आधारे बारामती तालुका पोलीस ठाण्यातील महिला पोलीस कॉन्स्टेबल एस. एस. देवकाते यांना सोबत घेऊन पथकाने बसस्थानक परिसरात सापळा रचला. यावेळी महिलेला ताब्यात घेण्यात आले. चौकशीदरम्यान तिने गुन्ह्याची कबुली दिल्याचे पोलिसांनी नमूद केले. तिच्याकडून चोरीस गेलेले चार तोळे वजनाचे सोन्याचे दागिने, ज्यांची किंमत ५ लाख ४ हजार रुपये आहे, जप्त करण्यात आले.
सदरची कारवाई ही पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम, स्थानिक गुन्हे शाखेचे पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक एस. डी. वाळुंज, ग्रेड पोलीस उपनिरीक्षक कारंडे, सहाय्यक फौजदार शिवाजी निकम, पोलीस हवालदार सचिन होळकर, स्वप्निल अहिवळे, पोपट नाळे, किशोर तेलंग, शैलेश स्वामी, पोलीस कॉन्स्टेबल तुषार चव्हाण, गणेश डेरे, राहिस मुलानी यांनी केली.
