मुंबई: मराठी मनोरंजनसृष्टीतील ज्येष्ठ अभिनेत्री आणि प्रसिद्ध लावणी नृत्यांगना मधू कांबीकर यांचे वयाच्या 73 व्या वर्षी निधन झाले आहे. गेल्या अनेक वर्षांपासून त्या आजारी होत्या आणि अंथरुणाला खिळून होत्या. त्यांच्या निधनामुळे मराठी चित्रपटसृष्टीतील एका महत्त्वाच्या पर्वाचा अंत झाला आहे. अभिनयासोबतच आपल्या लावणीच्या सादरीकरणातून त्यांनी रसिकांच्या मनावर वेगळी छाप उमटवली होती.
2016 मध्ये मुंबईतील यशवंत नाट्य मंदिर येथे लावणीचा कार्यक्रम सादर करत असताना त्यांना पक्षाघाताचा झटका आला. त्यांची प्रकृती अचानक बिघडल्याने त्यांना तातडीने मेकअप रूममध्ये नेण्यात आले. त्या वेळी त्या बेशुद्ध झाल्या होत्या आणि त्यांच्या शरीराची एक बाजू निकामी झाली होती. त्यानंतर त्यांच्यावर उपचार सुरू होते. काही दिवसांपूर्वी त्यांचा अंथरुणावर असतानाचा फोटो सोशल मीडियावरही चर्चेत आला होता.
मधू कांबीकर यांनी अनेक मराठी चित्रपटांमध्ये लक्षवेधी भूमिका साकारल्या. त्यांच्या अभिनयातील सहजता आणि पारंपरिक लावणी सादर करण्याची शैली यामुळे त्यांना विशेष ओळख मिळाली. ज्येष्ठ दिग्दर्शक जब्बार पटेल यांच्या एक होता विदूषक या चित्रपटात त्यांनी लक्ष्मीकांत बेर्डे यांच्या आईची भूमिका साकारली होती. या चित्रपटातील त्यांच्या लावणीच्या सादरीकरणाचेही कौतुक झाले. दादा कोंडके यांच्यासोबतही त्यांनी येऊ का घरात आणि मला घेऊन चला यांसारख्या चित्रपटांत काम केले. 2018 मध्ये मधू कांबीकर यांना झी चित्र गौरव पुरस्काराने सन्मानित करण्यात आले.
मधू कांबीकर यांच्या निधनाने मराठी मनोरंजनविश्वाने एक गुणी अभिनेत्री आणि लावणीच्या परंपरेला समृद्ध करणारी कलाकार गमावली आहे.
